Bıyl Pavlodar oblysynda 700 myń tonnadan astam kartop jınaldy. Asta-tók ónimniń 20 myń tonnasy turaqtandyrý qoryna salynyp, qysqy mezgilde óńir turǵyndaryn baǵasy arzan «ekinshi nanmen» qamtamasyz etý kózdelip otyr. Aldaǵy ýaqytta qoımalardan bosatylatyn kartoptyń kılosy 100 teńgeden qymbat bolmaýy kerektigi eskertildi.
О́ńirdegi birqatar kartop ósirýshi jáne oblys bıligi jergilikti naryqty kókónispen qamtý jónindegi memorandýmǵa qol qoıdy. Qujatqa sáıkes, aýyl sharýashylyǵy ónimderin dúken sórelerine tikeleı jetkizý maqsatynda 20 myń tonna kartop pen 5 myń tonna sábiz qoımalarda arnaıy saqtalmaq.
Bıyl aımaqta jınalǵan kartoptyń kólemi 700 myń tonnadan asty. О́nim byltyrǵydan 20 paıyzǵa kóp. Ishki naryqty tolyǵymen qamtamasyz etý úshin shamamen júz myń tonna túınek jetkilikti. Byltyr ádettegideı turaqtandyrý qorynda kartop saqtalyp, ol qysta arzan baǵada dúkenderge úlestirilgen edi. Alaıda satyp alýshylar ónimniń kóbi sapasyz ekenine shaǵymdanǵany esimizde. Oblysta zamanǵa saı qoımalar jetkilikti. Aldaǵy ýaqytta saqtalatyn kartop pen sábizdiń sapasy men baǵasyna qatysty másele týyndamaýy kerek.
– Kartop ósirýdi damytý úshin oblysta memlekettik qoldaýdyń barlyq sharasy qoldanylýda. Halyqqa eń birinshi kezekte qajet taýarlardyń turaqty baǵalary men joǵary sapasyn qamtamasyz etý kerek. Bul úshin oblysta qajetti kólemdegi qoımalar bar. Qala men aýdan ákimderi aýyl sharýashylyǵy basqarmasymen birlesip, áleýmettik dúkenderdi, jármeńkeler men fermerlik bazardy kartop jáne sábizdiń qajetti kólemimen qamtamasyz etedi. Baǵalardy turaqty túrde monıtorıngileý qolǵa alynady. Kókónis qoımalarynan satyp alynatyn kartoptyń shekti baǵasyn kılosyna 100 teńge etip belgileýdi uıǵardyq, – deıdi oblys ákimi Ábilqaıyr Sqaqov.
Aýyl sharýashylyǵy basqarmasynyń basshysy Nurbolat Maqashevtyń sózine súıensek, memorandým aıasynda 36 aýyl sharýashylyǵy sýbektisi arzan baǵaly ónimdi saqtaýǵa jaýapkershilik alyp otyr. Bul – memlekettik qoldaýǵa ıe kásipkerler. Mysaly, 2010-2022 jyldary óńirde sýarmaly alqaptardaǵy ınjenerlik-kommýnıkasııalyq ınfraqurylymdar qurylysyna bıýdjetten 20 mlrd teńge baǵyttalǵan. Bıyl 360 mln teńgege 5 myń tonna shamasyndaǵy kartop tuqymyn satyp alý sýbsıdııalandy.
Oblystyń ishki naryǵyn áleýmettik mańyzǵa ıe azyq-túlik taýarlarymen qamtý úshin osy aıdyń sońyna deıin Pavlodar qalasynda fermerlik bazardy iske qosý kózdelýde. Jalpy, sońǵy eki jarym jyl ishinde óńirdegi agroónerkásiptik keshenniń ónimi 2 esege artty.
Pavlodar oblysy