Kitaphana – bile bilgenge úlken tárbıe mektebi. S.Toraıǵyrov atyndaǵy Pavlodar oblystyq kitaphanasynda oqyrman úzilmeıdi. Mundaǵy oqyrman zaly zamanǵa saı jabdyqtalǵan, qashan barsań kitap paraqtarynyń sýsyldaǵan dybysy ǵana estilip turatyn tynyshtyq. Ár kelýshi qalaǵan kitabyn janynda turǵan kitap sórelerinen alatyndaı múmkindik te qarastyrylǵan.
Ishi óte jaıly oqyrman zalynyń kóńildiń hoshyn ashatyn qasıeti bar. Munda kóbine merzimdi basylymdar men sırek kitaptardy turaqty oqyp turatyndar, zertteý jumystarymen aınalysatyn oqytýshylar men stýdentter, oqýshylar keletini baıqalady. Jan saraıyn ashatyn kitaphanadaǵy sońǵy jańashyldyqtardyń enýine oqyrman zalynyń basshysy Sáýle Janqarınovanyń sińirgen eńbegi zor. Maman sonaý 1990 jyldan beri mekemede qyzmet etetinin bildik.
Jalpy, oblystyq kitaphanada búginde 400 myń kitap qory bar bolsa, sonyń 80 myńdaıy oqyrman zalynda ornalasqan. «Ashyq kitaphana» qaǵıdasyn negizge alǵan mádenı mekeme barlyq gazet-jýrnal men kitaptyń kelýshiler úshin qoljetimdi bolǵanyn qamtamasyz etýge kúsh salady eken.
– Osydan on shaqty jyl buryn bul zalda kópshilik qajet kitabyn nemese merzimdi basylymdardy bizden surap alyp oqıtyn. Qazir kez kelgen adam zalda ornalasqan sórelerden qajetin tabady. Eger izdegeni bizdiń zalda bolmasa, qyzmetkerlerimiz ózge bólimderden lezde ákelip beredi. Zalǵa jaıly ústelder men oryndyqtar qoıylǵan. Kelýshilerdiń bir-birine bóget jasamaý jaǵy muqııat oılastyrylǵan. Alty maman qyzmet kórsetemiz, Aısulý Balǵabaeva 30, Gúljan Bulanbaeva 20, Márııa Myrzaqanova 10 jyldan astam qyzmet atqaryp keledi. Bir jańadan kelgen jas kadrymyz bar, ózgeleriniń tájirıbesi qalyptasyp qalǵan, – deıdi Sáýle Asylbekqyzy.
Oqyrmandar kóbine til bilimi, qazaq tili men ádebıetine qatysty, poezııa kitaptaryn suraıdy eken. Aptasyna bir-eki márte bas suǵyp, Abaı, Shákárim, Dostoevskıı óleńderin oqyp turatyn oqýshylardyń qatary da az emes kórinedi. Jıi suralatyn kitaptar ishinde Máshhúr Júsiptiń kóptomdyqtary, Muzafar Álimbaevtyń óleńder jınaǵy bar. Jańa zamanda shyǵyp jatqan kitaptardan góri keńestik kezeńde jazylǵan klassıkalar – Ázilhan Nurshaıyqovtyń «Mahabbat qyzyq mol jyldar», Ábdijámil Nurpeıisovtiń «Qan men ter» romandary suranysqa ıe ekenin bildik.
Oqyrman zalynyń muryndyq bolýymen apta saıyn túrli mádenı is-sharalar uıymdastyrylady. Ahmet Baıtursynuly, Muhtar Áýezov, Ǵabıt Músirepov, Máýlen Balaqaev, Amanjol Shamkenovtiń jáne ózge de ult zııalylary men qalamgerleriniń shyǵarmashylyǵyna, ómirine arnalǵan konferensııalar, taǵylymdy keshter ótkizilip, mektep oqýshylary óz ónerlerin ortaǵa salady. Aı saıyn «Til óneri» otyrysy ótkizilip, jergilikti joǵary oqý oryndarynyń oqytýshylary oqýshylar men stýdentterge dáris oqıtyny taǵy bar.
PAVLODAR