Buqar jyraý atyndaǵy ádebıet jáne óner mýzeıiniń qyzmetkerleri Ahmet Baıtursynulynyń tóte jazý álippesin oqı bastady. Mýzeı mamandary keleshekte oǵan qosa qadym jazýyn da meńgerip, qorda saqtalyp turǵan, syry áli kúnge ashylmaǵan kóne qoljazbalardyń qupııasyn bilýge nıettenip otyr.
Buqar jyraý atyndaǵy ádebıet jáne óner mýzeıiniń negizgi qyzmet baǵyty – jádigerlerdi zertteý, jınaqtaý, nasıhattaý. Osy mindetti atqarý barysynda qyzmetkerler kóptegen qıyndyqtarǵa kezdesip kelgen eken. Sonyń biri – qoljazbalarmen jumys isteý barysynda tóte jazýdy oqı almaý. Sol sebepti mamandar Aqańnyń tóte jazý álippesin oqýdy bastady. Sabaq aptasyna bir ret ótedi. Oqytýshy Pavlodar pedagogıkalyq ýnıversıtetiniń dosenti, fılologııa ǵylymdarynyń kandıdaty Ádilbek Ámirenov.
– Bizdiń mýzeıimizde arab qarpinde tóte jazýmen jazylǵan 20-dan asa kitap jáne qadym jazýymen túsirilgen biraz kóne qoljazbalar saqtalyp tur. Tóte jazýlardyń basym bóligi oqylyp, túsinikteri berilgen. Al qadym jazýlardyń anyqtamalary bar bolǵanymen, oqylmaǵan. Máselen, tóte jazýdaǵy Qamar Qasymovtyń qoljazbalary, Dıhan Ábilev babamyzdyń hattary, qoljazbalary, tipti bizdiń qorymyzda múlde ashylmaǵan eski jazýlar da kezdesip otyr. Latyn árpinde Sábıt Dónentaevtyń jazbalary, Isa Baızaqovtyń qoıyn dápteri de saqtalyp qalǵan. Osy jádigerlerdiń barlyǵyn mýzeı qyzmetkerleri oqyp, tanı bilýi kerek degen maqsat qoıyp otyrmyz. Bizdiń qyzmetimiz mýzeıde túrli keshter ótkizýmen ǵana shektelmeıdi. Eń bastysy, ár mamanymyz jádigerlerdi jınaqtap qana qoımaı, olardy zerttep, nasıhattaý jumystarymen derbes shuǵyldana alatyn deńgeıge jetýi kerek, – deıdi mýzeı basshysy Erbol Qaıyrov.
Qazirgi kúni mádenı mekeme mamandary aýyl-aýyldardy aralap, túrli qoljazbalardy jınastyryp, kóptegen kóne qariptermen jazylǵan kitaptardy taýyp jatyr. Jaz boıy júrgizilgen túrli ekspedısııalar men ólketaný sharalary óz jemisin bergen syńaıly. Endi bul jádigerlerdi mýzeı maıtalmandary asyqpaı zerttep, keıin kópshilikke usynady. Keıbir turǵyndar óz úıinde jyldar boıy saqtap kelgen kóne kitaptary men qoljazbalaryn mýzeıge tapsyrmas buryn mekeme mamandary áýeli kelip, oqyp kórse degen ótinish aıtady eken. Osyndaı ýaqytta qınalyp qalamyz deıdi Erbol Mátiuly.
Aıtyp óteıik, jaqynda munda Ahmet Baıtursynulynyń «Masa» kitabynyń túpnusqasy tabyldy. Arab árpinde, tóte jazýmen terilip basylǵan kóne kitapty Aqqýly aýdanynyń turǵyny ákep tapsyrǵan eken. Úı úlkenderi ony Quran dep oılap, saqtap kelse kerek. Ult ustazynyń 150 jyldyq mereıtoıynda bul úlken jańalyqtyń biri boldy.
PAVLODAR