QR Parlament Senatynyń depýtaty Serikbaı Trumovtyń tóraǵalyǵymen ótken jıynda Qarjy jáne bıýdjet komıtetiniń senatorlary respýblıkalyq bıýdjet jobasyn jan-jaqty qarap, aldaǵy kezeńge arnalǵan bıýdjet shyǵystarynyń negizgi baǵyttaryn talqylady, dep habarlaıdy Egemen.kz.
QR Parlamentiniń Senatynda «2023-2025 jyldarǵa arnalǵan respýblıkalyq bıýdjet týraly», «Qazaqstan Respýblıkasynyń Ulttyq qorynan 2023-2025 jyldarǵa arnalǵan kepildendirilgen transfert týraly» jáne «Respýblıkalyq jáne oblystyq bıýdjetter, respýblıkalyq mańyzy bar qala, astana bıýdjetteri arasyndaǵy 2023-2025 jyldarǵa arnalǵan jalpy sıpattaǵy transfertterdiń kólemi týraly» zań jobalarynyń tanystyrylymy boldy.
Jıyn barysynda Qarjy mınıstriniń orynbasary Tatıana Saveleva men ulttyq ekonomıka mınıstriniń orynbasary Azamat Amrın baıandama jasady.
Qarjy mınıstriniń orynbasary bıylǵy jyly Bıýdjet kodeksine qabyldanǵan túzetýlerdi eskere otyryp, úsh jyldyq kezeńge arnalǵan respýblıkalyq bıýdjet týraly zań jobasy boıynsha materıaldar quramyna bıýdjet táýekeli men memlekettik qarjynyń uzaq merzimdi turaqtylyǵy týraly taldamalyq esep alǵash ret engizilgenin habarlady. Sondaı-aq áleýmettik salany, ekonomıkanyń naqty sektoryn jáne elimizdiń áleýetti qurylymdaryn qarjylandyrýdy kúsheıtý de josparlanyp otyr.
Ulttyq ekonomıka mınıstriniń orynbasary Ulttyq qordyń jınaq fýnksııasyn kúsheıtýdiń jańa tetigi men 2030 jylǵa qaraı valıýtalyq aktıvterdi 100 mlrd AQSh dollaryna deıin ulǵaıtý jolymen qysqartýǵa jol bermeý týraly aıtyp berdi. Osylaısha, 2023 jyly respýblıkalyq bıýdjetke kepildendirilgen transferttiń mólsheri 2,2 trln teńge mólsherinde belgilendi, 2024 jylǵa qaraı 2 trln-ǵa deıin jáne 2025 jylǵa deıin 1,9 trln-ǵa deıin qysqaratyn bolady.
Jalpy sıpattaǵy transfertterdiń kólemi týraly zań jobasynda bıýdjetaralyq qatynastardy jetildirý boıynsha jekelegen tásilder usynyldy. Olardyń qatarynda óńirlerdiń derbestigin arttyrý, bıýdjetterdiń kiris bazasyn nyǵaıtý, bıýdjettik josparlaýda bıýrokrattyqtan bas tartý jáne basqalar bar.
Ulttyq bank ókili elimizdiń aqsha-nesıe saıasaty salasyndaǵy ahýal týraly aıtyp berdi. Al Esep komıtetiniń múshesi tusaýkeser barysynda «2023-2025 jyldarǵa arnalǵan respýblıkalyq bıýdjet týraly» zań jobasyna komıtettiń qorytyndysyn usyndy.
Zań jobalary Senatta komıtettiń jumys toptary men otyrystarynda talqylanyp, keıinnen Palatanyń qaraýyna usynylady.