Ulttyq erekshelikti ulyqtaǵan kórme

Máýlen Áshimbaev murajaıdy aralaý barysynda Akademııa múshelerimen áńgimelesip, jańa jádigerlermen tanysty. Ekspozısııada 150-den astam keskindeme, 30-dan astam grafıkalyq jumys jáne músin bar. Olardyń kópshiligi sońǵy jyldary somdanǵan jáne áli ónersúıer qaýymnyń nazaryna usynylmaǵan týyndylar. Senat Tóraǵasy bul mádenıet pen óner ult­tyq erekshelikti saqtaýdaǵy asa mań­yz­dy máselelerdiń biri ekenin atap ótti.

«Kóshpelilerdiń estetıkasy men dúnıetanymy óte tereń jáne erekshe. Kóshpelilerde adam tabıǵatpen etene jaqyn bolyp, álemniń úılesimdi bóligine aınaldy. Qorshaǵan ortaǵa janashyrlyqpen qaraý – kóshpelilerdiń dúnıetanymyndaǵy mańyzdy erekshelik­ter­diń biri. Osynyń bári kóshpeli halyqtardyń beıneleý ónerinde de kóri­nis tapty», dep atap ótti Máýlen Áshim­baev.

Senat Tóraǵasynyń pikirinshe, búgin­de kóptegen otandyq sýretshiler kóshpe­lilerdiń ónerin zamanaýı turǵyda zerdelep, ony álemdik mádenıettiń mańyzdy bóligine aınaldyrý jolynda eseli eńbek etip keledi.

«Sýretshiler arasyndaǵy bizdiń qurmetti aqsaqalymyz Amandos Aqanaev kóshpelilerdiń estetıkasy týraly ózi túıgen tanymdy beıneleýge búkil ómirin arnady. Onyń bul baǵytta qol jetkizgen jetistikteri aýqymdy laıyqty. Sonymen qatar ol shákirtter shoǵyryn tárbıeledi», degen Máýlen Áshimbaev óner qaıratkerine alǵysyn bildirdi.

Senat Tóraǵasy sonymen qatar «Uly dala sazy» kórmesi ulttyq kodty saqtaý turǵysynan asa mańyzdy ról atqaratynyn atap ótti. «Kórkemóner akademııasy» qoǵamdyq qory Qazaqstan aýmaǵynda da, odan tys jerlerde de túrli kórmeler ótkizýde belsendi qyz­met atqaryp keledi. «Uly dala sazy» kórmesi beıneleý ónerin óristetý jáne Akademııa músheleriniń shyǵar­ma­shy­lyǵyn dáripteý maqsatynda ótkizi­lip otyr.

Kórmeniń ashylý saltanatyna Má­denıet jáne sport mınıstri Dáýren Abaev, Astana qalasynyń ákimi Altaı Kólginov, dıplomatııalyq korpýs pen shyǵarmashylyq zııaly qaýym ókilderi, memleket jáne qoǵam qaıratkerleri, mádenıettanýshylar qatysty.