Qazaqstan men Túrkııa arasyndaǵy kelisimge sáıkes endi bizdiń taýarlar iri túrkııalyq marketpleıs – Trendyol arqyly satylatyn boldy. Bul jaıly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın málimdedi.
Mınıstrdiń aıtýynsha, bul ıdeıa Prezıdent Qasym-Jomart Toqaevtyń Túrkııaǵa memlekettik sapary aıasynda bastalǵan.
«Osy eldiń birqatar kompanııasymen kelissózder júrgizip, otandyq IT-kompanııalardy tanystyrǵan bolatynmyn. Solardyń biri – baýyrlas eldiń naryǵynda onlaın-saýda boıynsha kóshbasshy kompanııa sanalatyn Trendyol bolatyn. Trendyol – Túrkııa aýmaǵynda ınternet-dúken arqyly, ıaǵnı ózderiniń elektrondy platformasy arqyly taýar jetkizýmen jáne satýmen aınalysady (kúnine shamamen 1,5 mln taýar satady). Trendyol-dy Túrkııada jergilikti Amazon nemese Alibaba dep ataıdy. Kompanııanyń quny shamamen 16 mlrd dollar qarjyny quraıdy», deıdi B.Mýsın.
Onyń aıtýynsha, sapar kezinde olardyń taýaryn Qazaqstanǵa jetkizý máselesi boıynsha logıstıka jaǵdaıy pysyqtalǵan. Sáıkesinshe, qazaqstandyq taýarlardy atalǵan marketpleıs kómegimen Túrkııa naryǵyna shyǵarý týraly da kelisim jasalǵan.
«Kóptegen qazaqstandyq Trendyol-men tanys jáne kóbinese deldaldar arqyly taýarlarǵa tapsyrys berýge tyrysady. Bul, árıne, Qazaqstannan kelgen klıent úshin jetkizý merzimi men baǵasyna áser etedi. Endi, mine, bul bastama Túrkııa Respýblıkasynyń Prezıdenti Rejep Erdoǵannyń Qazaqstanǵa sapary aıasynda óz nátıjesin kórsetti. Búgin aımaqtyq marketpleısterge qyzmet kórsetetin qazaqstandyq logıstıkalyq kompanııalardyń biri – Big Way KZ túrkııalyq Trendyol kompanııasymen yntymaqtastyq týraly kelisimge qol qoıdy. Big Way KZ – otandyq naryqta logıstıkalyq taýar aınalymyn júzege asyrýmen aınalysyp kele jatqan kompanııa. Olardyń sheteldik naryqqa shyǵýyna áleýeti aıtarlyqtaı zor. Birlesken kelisimniń nátıjesinde endi qazaqstandyq taýarlar Túrkııa naryǵyna tikeleı, deldalsyz satylady», dedi.
Atalǵan bastamanyń aldaǵy ýaqytta nátıjeli bolaryna senim bildirgen mınıstr osy rette túrik tarapymen kelissózder ótkizýge qoldaý kórsetken Qazaqstannyń Ystanbuldaǵy Bas konsýldyǵyna jáne Bas konsýl Álim Baıelge rızashylyǵyn bildiretinin de jetkizdi.
Qazir eki el arasynda saýda-ekonomıkalyq baılanystar úlken qarqynmen damyp kele jatyr. Memleketaralyq taýar aınalymy 2022 jyly 3,5 mlrd dollardy quraǵan. Sarapshylardyń aıtýynsha, bul sıfr áli joǵary qarqynmen óse túsedi dep boljanady.
Qazaqstan men Túrkııa óńirlik jáne halyqaralyq baılanystardy berik órkendetýde. Qazirgi tańda eki el arasynda 140 ınvestısııalyq joba boıynsha kelisim bar. Olardyń jalpy somasy – 6 mlrd dollar.