Qazaqstanda mamandandyrylǵan mektepterdiń sany 134-ke jetti, olarda 72 myń bala oqıdy, dep habarlaıdy Egemen.kz Oqý-aǵartý mınıstrliginiń resmı paraqshasyna silteme jasap.
Qazaqstanda mamandandyrylǵan mektepterdiń sany 134-ke jetti. Oqý jylynyń basynan beri bul mektepterde 72 myńnan astam oqýshy bilim alyp jatyr. Daryndy balalarmen 8 myńnan astam pedagog jumys isteıdi.
Mamandandyrylǵan mektepter elimizdiń barlyq aımaǵynda ashylǵan. Emtıhandardan súrinbeı ótken balalar bul bilim ordalarynda tegin bilim ala alady. Sonymen qatar bıyl Balalar jylynda alǵash ret áleýmettik osal toptan shyqqan balalarǵa erekshe múmkindikter jasaldy.
«Mınıstrlik daryndy balalardy qoldaý boıynsha jan-jaqty jumys júrgizip jatyr. Qazirgi kúni 134 mamandandyrylǵan mektep jumys isteıdi. Daryndy balalar respýblıkalyq jáne halyqaralyq olımpıadalarǵa belsene qatysyp, jeńis tuǵyrynan kórinip júr. Mysaly, byltyr 420-dan astam oqýshy respýblıkalyq olımpıadalardyń júldegerleri men jeńimpazdary atandy. Olardyń ustazdary da jaqsy úlgi kórsetip, «Úzdik pedagog», «Úzdik avtorlyq baǵdarlama», «Pedagogıkalyq ıdeıalar festıvali», «Daryndy balalardyń talantty muǵalimi» syndy baıqaýlarǵa qatysyp júr», dedi «Daryn» respýblıkalyq ǵylymı-praktıkalyq ortalyǵynyń dırektory Ánýar Unaıbekov.
134 mekteptiń 94-i jaratylystaný-matematıka baǵytynda, 6 mektep qoǵamdyq-gýmanıtarlyq baǵytta, 8-i kópsalaly, 5-eýi áskerı sport, 6-ýy mýzykalyq-estetıkalyq baǵytta jumys isteıdi. Taǵy 15 mektepke Abaı Qunanbaev esimi berilgen. 95 mektepte ınternat úıleri bar.