Shymkenttegi Jastar resýrstyq ortalyǵynda Respýblıka kúnine oraı Qazaqstan halqy Assambleıasynyń «Qaıyrymdylyq kerýeni» atty respýblıkalyq forýmy men gala-konserti ótti.
Atalǵan is-shara Qazaqstan halqy Assambleıasy, Aqparat jáne qoǵamdyq damý mınıstrligi «Qoǵamdyq kelisim» RMM jáne Shymkent qalasy ákimdiginiń qoldaýymen uıymdastyryldy.
Forým jyl saıyn balalar shyǵarmashylyǵyn damytý, múmkindigi shekteýli balalardyń jetistikterin pash etý, tulǵa retinde qalyptastyrý jáne qazirgi qoǵamǵa, áleýmettik ortaǵa beıimdeý maqsatynda qolǵa alynady.
Jıynda tirek-qımyl apparaty buzylǵan, kórý, estý qabileti nashar jáne túrli janrlarda shyǵarmashylyqpen aınalysatyn balalar (aspaptyq mýzyka, halyqtyq, akademııalyq, estradalyq jeke án aıtý, avtorlyq án, poezııa, kórkemsóz, erekshe janr, pantomıma, horeografııa, beıneleý jáne sándik-qoldanbaly óner) men balalar ujymdary óner kórsetti.
Is-sharaǵa óńirlerden kelgen arnaıy delegasııalar, Shymkent qalasynyń depýtattary men kásipkerleri, mesenattar, qaıyrymdylyq uıymdary men qorlar, Qazaqstan halqy Assambleıasynyń músheleri, etnomádenı birlestik ókilderi, úkimettik emes uıymdar, eriktiler qozǵalysynyń kóshbasshylary qatysty.
Sonymen birge forým Qazaqstan Respýblıkasy Prezıdentiniń 2022 jylǵy 15 qyrkúıektegi №1014 Jarlyǵymen bekitilgen Qazaqstan halqy Assambleıasynyń 2022-2026 jyldarǵa arnalǵan damý tujyrymdamasyn júzege asyrý jónindegi is-qımyl josparynyń 8.1 tarmaǵyn iske asyrý maqsatynda jáne Balalar jyly sheńberinde uıymdastyryldy.
Jıyn baǵdarlamasynyń aıasynda júzge jýyq bala Shymkent qalasynyń kórikti jerlerin aralap, haıýanattar baǵyn tamashalady.
О́z kezeginde qalamyzdaǵy etnomádenı birlestikter balaqaılarǵa kóterińki kóńil kúı syılaýǵa atsalysyp, óz tarapynan kádesyılaryn tabystady.
– Qazaqstan halqy Assambleıasynyń uıytqy bolýymen ótip jatqan ıgi sharanyń basty maqsaty – múmkindigi shekteýli balalardyń shyǵarmashylyǵyn qoldaý arqyly jas býyndy damytý men tárbıeleý. Halqymyzdyń «Keń bolsań, kem bolmaısyń» deıtin naqyl sózin boıyna sińirgen etnobirlestikter qaıyrymdylyq kórsetýdi ózderine azamattyq paryz dep bilip, muqtaj jandarǵa árdaıym qolushyn sozyp keledi. Qaıyrymdylyq syndy qasıetti qundylyqty dáripteýdi kózdegen «Qaıyrymdylyq kerýeni» forýmy – qoǵamdyq kelisim men jalpyulttyq birliktiń basty faktory retinde qoǵamda meıirimdilik pen ózara rııasyz kómek jasaýǵa yqpaldasýdy abyroımen atqaryp keledi. «Keń peıildi kemimes, tar peıildi keńimes» degen qanatty sózben búgingi forýmǵa atsalysqandarǵa shynaıy alǵys aıtamyn. El ıgiligi jolyndaǵy jumystaryńyzǵa tabys, otbasylaryńyzǵa baq-bereke, amandyq tileımin! – dedi Shymkent qalasynyń ishki saıasat jáne jastar isteri jónindegi basqarmasynyń basshysy M.Shotanov.
Jalpy, megapolıste el birligin arttyrý, shahardy rııasyz dostyq mekenine aınaldyrý baǵytynda Assambleıa janyndaǵy qoǵamdyq qurylymdar men 17 etnomádenı birlestik músheleri aıanbaı eńbek etip keledi.
Sonymen qatar Shymkent qalalyq Qazaqstan halqy Assambleıasy músheleri qaıyrymdy ister jasaýda kósh bastap tur. Qazirgi tańda saýapty is Assambleıa jumysynyń bir baǵyty bolyp qalyptasty. Buǵan dálel retinde keshegi Qostanaı oblysyndaǵy órt saldarynan týyndaǵan jaǵdaıǵa baılanysty shymkenttik Assambleıa músheleri tarapynan 2 mln 265 myń teńge kóleminde gýmanıtarlyq kómek kórsetilgenin, jalpy jyl basynan beri QHA 8,7 mln teńge mólsherinde qaıyrymdylyq is jasaǵanyn atap ótken jón.
Qalalyq Assambleıa janyndaǵy kásipkerler qaýymdastyǵy bıyl III toqsannyń ózinde «Mektepke jol» aksııasy aıasynda 150 oqýshyny qajetti oqý-quraldarmen, kıim-keshekpen qamtamasyz etti.
Budan bólek, Qazaqstan halqy Assambleıa músheleri túrli qaıyrymdylyq is-sharalardan, kópbalaly jáne jalǵyz basty analardy, múmkindigi shekteýli balalardy ómirge ıkemdeý, kómek kórsetý sııaqty ıgi isterden shet qalmaýda.
ShYMKENT