Qazaqstannyń burynǵy Qorǵanys mınıstri Murat Bektanovqa qatysty qylmystyq is sotqa jetti. Bul týraly OKQ-da Bas prokýratýranyń Qylmystyq qýdalaý qyzmeti bastyǵynyń orynbasary Eldos Qılymjanov málimdedi, dep habarlaıdy Egemen.kz.
«Qazirgi ýaqytta sotta burynǵy Qorǵanys mınıstri Bektanovtyń isi qaralýda», dedi Eldos Qılymjanov.
Sondaı-aq ol Almaty qalasy, Almaty jáne Qyzylorda oblystary UQK departamentteriniń burynǵy basshylaryna jáne Almaty oblysy polısııa departamentiniń, Almaty áýejaıynyń Jelilik polısııa bóliminiń burynǵy basshylaryna qatysty ister boıynsha sotqa deıingi tergeý materıaldarymen tanysý rásimi júrip jatqanyn aıtty.
Budan basqa, Taldyqorǵan jáne Almaty qalalarynda tergeýdiń ruqsat etilmegen ádisterin qoldaný faktisi boıynsha sotqa segiz polısııa qyzmetkerine qatysty eki qylmystyq is jiberildi.
«Barlyǵy quqyq qorǵaý jáne arnaıy organdardyń 29 qyzmetkeri kúdikti dep tanyldy, onyń 8-i sotta, 20-sy is materıaldarymen tanysý satysynda jáne bireýi tergeýde», dep túsindirdi Eldos Qılymjanov.
Eske sala ketsek, 19 qańtarda Memleket basshysy Qazaqstannyń burynǵy Qorǵanys mınıstrin komandırlik qasıetteriniń joqtyǵy úshin synǵa aldy. Sol kúni Prezıdent Jarlyǵymen Murat Bektanov Qorǵanys mınıstri qyzmetinen bosatyldy.
19 aqpanda Bas prokýratýra burynǵy Qorǵanys mınıstri Murat Bektanovqa qatysty qyzmettegi áreketsizdik faktisi boıynsha sotqa deıingi tergeýdi bastady.
20 aqpanda Murat Bektanov ustalyp, ýaqytsha ustaý ızolıatoryna qamaýǵa alyndy.