Botokspen sal aýrýyn emdeıdi

Qazaqstanda kosmetologııadaǵy eń kóp taralǵan preparattardyń keıbiri medısınada tıimdi qoldanyla bastaǵan. Mańdaıdaǵy, qas pen kóz aınalasyndaǵy jáne erindegi ájim­derdi ketirý úshin keńinen paıdalanylatyn jalpyǵa tanymal botýlıksın dıstonııa, mıgren, gıpergıdroz, vegetatıvti buzylýlar jáne serebraldyq sal aýrýy sııaqty aýrýlardy emdeýde tıimdiligin baıqatyp otyr.

Sal aýrýyna shaldyqqan balanyń anasy Indıra Nurǵalıevanyń aıtýynsha, dısport egilgennen keıin jetkinshektiń densaýlyq jaǵdaıy qalpyna kele bastaǵan kórinedi.

– Egizderdiń úlkeni bir ekpeden keıin 3-4 qadam jasaı bastady. Qol-aıaǵynyń sińirleri sozylyp, jalpy jaǵdaıynyń jaqsarǵanyn baıqadyq. Biz osy jyldyń qyrkúıeginde ekinshi ekpeni aldyq. Qazir balamnyń jaǵdaıy óte jaqsy deýge bolady. О́zdiginen 1-1,5 metrge deıin júre alady. Botoksqa paıdalanylatyn preparatqa qatysty bastapqyda senimsizdik bolǵan. Degenmen nátıjesin kórgen soń boıymyzdaǵy qorqynysh seıilip sala berdi. Qazir balapanymyzdyń densaýlyǵyn qalypty ustap, bulshyq­etteriniń jıyrylýyn boldyrmaý úshin kosmetologııalyq ekpege degen senimimiz nyǵaıa tústi, – deıdi ana.

Medısına ókilderiniń sózine súıensek, preparat adamnyń qol-aıaǵyndaǵy bulshyqetterdiń patolo­gııalyq tonýsyn tómendetip, ońaltý emsharalary men bala kútimin jeńildetedi. Terapııany neǵurlym erte bastasańyz, ońaltý ońaıyraq bolatynyn aıtady mamandar.

– Biz bul preparatty aı saıyn birneshe emdelýshige salamyz. Baryn­sha jaqsy nátıje kórip otyrmyz. Emdelip jatqandar mezgil saıyn kelip saldyrýy kerek. Sebebi arada uzaq ýaqyt ótse, tıimdiligi tómendeıdi. Keıbireýler úshin botýlıksınniń áseri 3-4 aıǵa nemese odan da kóp ýaqytqa jetýi múmkin. Munyń bári adam aǵzasyna tikeleı baılanysty. Al teris áseri ázirshe baıqalmaıdy, – deıdi óńirdiń bas shtattan tys balalar nevropatologi, oblystyq balalar aýrýhanasynyń nevrologııa bóliminiń meńgerýshisi Arman Imanov.

Bul rette naýqas balalar preparatty MÁMS esebinen oblystyq balalar aýrýhanasynan ala alatynyn aıta ketken jón.

Pavlodar oblysy