Astana – Pavlodar: Bılet baǵasy 10 myń teńge

Qazaq Air qyzmet kórsetetin jolaýshylar reısi 2 qarashadan bastap iske kiristi. Bul kúni elordadan shyq­qan alǵashqy ushaq Pavlodar áýe­jaıyna kelip qondy. Buǵan deıin atal­ǵan baǵyttaǵy áýe baılanysyn túrli kompanııalar júzege asyryp, so­ńynda jolaýshylar aǵyny azaıdy degen sebeppen toqtap qalǵan edi. Memleket basshysy Qasym-Jomart Toqaev jýyqta óńirimizge jumys saparymen kelgende Astana men Kerekýdi qosatyn áýe reısin qalpyna keltirý týraly tapsyrma berdi. Prezıdenttiń tapsyrmasy, osylaısha, aı ótpeı jatyp ómirsheń etilgenine kýá bolyp otyrmyz. Endi óńir azamattary bas qalaǵa tek avtokólikpen nemese poıyzben ǵana emes, ushaqpen de jete alady. Áýe kemesiniń kesteni turaqty saqtaýy memleket bıýdjetinen sýbsıdııalanbaq.

«Pavlodar áýejaıy» AQ basqarma tóraǵasy Eskendir Jandáýletovtiń aıtýynsha, bir baǵytqa satylatyn bı­lettiń quny – 10 myń teńge. «15 jasqa de­ıingi balalarǵa jeńildik qaras­ty­rylǵan, bılet qunyna 20 kılogramǵa deıingi bagaj jáne 5 kılogramǵa deıingi qol júgin tegin alyp júrý kiredi. Astanadan ushý ýaqyty saǵat 15.05-te. Ushaq Pavlodarǵa 16.05-te qonyp, 16.35-te kelgen jaǵyna ushyp kete­di. Iаǵnı eki ortaǵa áýe kemesi shamamen 1 saǵattaı ýaqyt jumsaıdy», deıdi áýejaı basshysy.

Áýejaıdaǵylar jolaýshylar nópiri alǵashqy kúnnen-aq baıqalǵanyn atap ótti. Bir aptanyń bıletteri bir kúnde satylyp ketken. Jalpy reıs dúısenbi, sársenbi, juma jáne jeksenbi kúnderi qyzmet kórsetedi. Jolaýshylardy Bombardier Q400 ushaǵy tasymaldaıdy, oǵan 76-dan 82-ge deıin adam syıady.

Aıta ketelik, pandemııa kezeńinde ushaq bıletiniń quny 12-40 myń teńge aralyǵynda bolyp kelgen. О́mirdiń barlyq salasy qymbattap jatqan kezeńde bul baǵyttaǵy áýe reısimen júrý quny nebári 10 myń teńgeni qu­raýy óńir halqyn qýantyp otyr. Búginde Pavlodardan Astanaǵa jumys babymen jıi baratyn, vahtalyq aýysym úshin elorda arqyly ushatyn azamattar áýe kemesiniń tıimdi bolatynyn aıtady.

PAVLODAR