«Qanattylar» ınklıýzıvti teatry ekinshi maýsymdy Roza Muqanovanyń «Máńgilik bala beıne» pesasy jelisinde sahnalanǵan «Qyzjylaǵan» premerasymen ashty. Qoıylymǵa Semeı polıgony zardabynan eseımeı qalǵan qyzdyń taǵdyry arqaý bolǵan. Armany – bıik, kóńili asqaq Láılá jıylǵan qalyń kórermendi ári kúrsintti, ári kúldirdi, sóıte-sóıte sońynda bárimizdi tereń bir quzdan laqtyryp kep jibergendeı boldy.
О́ziniń bala kúngi dosy Qumarmen kezdeskende Láılá oǵan degen sezimin jasyra almaıdy. Biraq táni salaýatty Qumardyń aldynda óziniń óspeı qalǵan boıynan, uzyn qoldarynan qysylady. «Meni saǵyndyń ǵoı, ıá, Qumar?» dep erkeleıdi. Qumar da búkil sharapatyn Láıláǵa tógedi. Láılá taǵdyryna kýá bolyp otyryp sanańnyń bir sátke de múlgip ketýi múmkin emes. Láılá men Qumardyń oıyny árbirimizdiń ishimizde únsiz buǵyp jatqan áldebir qudiretti qaıta tiriltkendeı, múlgip jatqan sezimderge jan bitirgendeı boldy. Kenet, tálkek etken taǵdyrdy qaıta aldyńa tartady. Spektakl mýzykasy, ondaǵy tragedııa, ondaǵy adamdardyń kóńil aýany, oı aǵyny, qımyl-qozǵalysy qandaı úılesim tapqan deseńizshi.
Apasynyń: «Qonaqtar kelgende sen osy syqylyqtap kúle bermeshi, sosyn basyńa bantık taǵyp al, bala qalpyńnan arylma, sen eseıgen joqsyń, sen áli balasyń», dep shetqaqpaı jasaǵanyna kónbeı, muń-syryn jaryq aıǵa aıtady. Onyń jalǵyz muńdasy – aı. Odan keıingi bar úmiti – Qumar.
Spektakldiń qoıýshy rejısseri Abzalbek Ashatuly jańashyl kózqarasymen, rejısserlik sheshimniń erekshe tereń, maǵynaly bolýymen kórermendi tańǵaldyrdy.
Premeraǵa Láılániń prototıpi, Roza Muqanovanyń «Máńgilik bala beıneni» jazýyna túrtki bolǵan Eńlik te keldi.
«Polıgonnyń kesirinen múgedek bolyp qalǵan jandardyń sýretteri qoıylǵan fotokórmeden alǵash ret Eńliktiń sýretin kórdim. Bala beınede óspeı qalǵan jasóspirim perishte qyzdyń sýreti maǵan úlken áńgime jazdyrdy. Ol spektaklge aınaldy, ol kınofılmge aınaldy, ol qýyrshaq teatrynda da qoıyldy. Elimiz táýelsizdik almaǵanda mundaı jabyq taqyryptardy jaza almaǵan bolar edim. Táýelsizdiktiń arqasynda ashyq jazyp, jurtqa jetkize aldyq. Men ózim Eńlikti búgin birinshi ret ómirde kórip turmyn, aınalaıyn ǵumyr jasyń uzaq bolsyn, perishte qyz», dedi Roza Muqanova.
Qoıylymdy tamashalaǵan Aqparat jáne qoǵamdyq damý mınıstri Darhan Qydyráli de shyǵarmashylyq topqa erekshe alǵysyn jetkizdi.
«Tebireniske toly keremet qoıylymdy kórdik. Biz qasiretimizdi qasıetimizben jeńgen halyqpyz. Osyndaı keremet shyǵarma úshin Roza apaıǵa alǵys aıtamyn. Osy týyndyny oryndaǵan «Qanattylar» ınklıýzıvti teatrynyń ónerpazdaryna rızashylyǵymdy bildiremin. Biz sizdermen maqtanamyz, sizderdiń shyn máninde qanattaryńyz bar. Osyndaı tazalyqtaryńyzben, shynaıy ónerlerińizben qalyqtaı berińizder», dedi mınıstr.
Basty róldegi Láılá beınesin sporttyq bıden halyqaralyq jarystardyń chempıony, endigi kezekte ǵajap aktrısalyq qabiletimen tanylǵan Malıka Muhtarova somdasa, Qumar beınesindegi debıýttik rólin jas akter Álıhan Nurlanuly úlken abyroımen alyp shyqty.