Bul týraly Qasym-Jomart Toqaev Samarqanda ótip jatqan Túrki memleketteri uıymy sammıtinde aıtty, dep habarlaıdy Egemen.kz.
«Taǵy bir mańyzdy máselege toqtalǵym keledi. Túrki memleketteri uıymynyń qyzmetin buqaralyq aqparat quraldary arqyly belsendi túrde dáripteýimiz kerek. Bul – óte qajet nárse. Osy jumysty elderimizdiń ishindegi aqparat quraldary jáne belgili halyqaralyq agenttikter aıasynda júrgizýge bolady. Sebebi, álem qaýymdastyǵy bizdiń túrki álemindegi yqpaldastyqty nyǵaıtý úshin jasap jatqan aýqymdy jumysymyz týraly bilýi qajet», dedi Prezıdent.
Q.Toqaev jahan jurtshylyǵy bizdiń uıymnyń jumysy týraly áli de jaqsy bile bermeıtinin atap ótti. Degenmen, qazir Túrki yntymaqtastyǵy ıdeıasy búkil álemniń nazaryn ózine aýdara bastaǵanyn, sondaı-aq túrki órkenıetinen habar beretin qundy derekterdiń tabylyp jatqanyna toqtaldy. «Bul – bizdiń elderimizge ortaq qundylyqtar. Sondyqtan, qolda bar tarıhı jáne tildik derekterdi júıelep, retke keltirý mańyzdy mindet dep oılaımyn. Ǵylymı ınstıtýttardyń jáne mekemelerdiń aıasynda belsendi jumys uıymdastyryp, ony álem jurtshylyǵyna keńinen tanystyrýymyz kerek. Uıymnyń jumysy dıplomatııalyq sammıtter men qorytyndy qujattary bar kezdesýlermen ǵana shektelip qalmaǵany jón. Túrki memleketteri uıymy barsha túrki álemindegi halyqtardy jaqyndastyratyn yqpaldy ortalyqqa aınalýy qajet dep sanaımyn», dedi Qasym-Jomart Kemeluly.