«Balalar jyly» aıasynda KSRO sport sheberi, Qazaqstan Respýblıkasynyń Qurmetti sport qaıratkeri Amangeldi Aımaǵambetovtiń qurmetine erkin kúresten 2008 jylǵy jáne odan kishi jasóspirimder arasynda qalalyq ashyq birinshilik ótti.
Amangeldi aǵanyń esimi aımaqtyń sportsúıer qaýymyna jaqsy málim. Keńes ókimeti tusynda erkin kúrestiń sheberi atanyp, talaı márte baıraqty dodalarda top jarǵan sportshy ákeden erte qalǵan. Ákesi 37-shi jyly «halyq jaýy» degen jalamen ustalyp ketken soń balalar úıine óz erkimen barady. Onda ózi qatarlas balalarmen alysyp-júrisip júrip kúrestiń negizgi tásilderin alǵashqy muǵalimderinen úırene bastaıdy. Keıin Pavlodar qalasyna kelip, joǵary sporttyq bilim alady. Sporttaǵy órleý jolyn bizdiń oblysta bastaǵan aǵamyz sheberliginiń arqasynda dúıim respýblıkaǵa tanymal bolyp, Qazaqstan sportynyń tarıhynda óshpes iz qaldyrdy. 1959 jyly aımaqtar arasynda ótken alamanda jartylaı aýyr salmaqta synǵa túsip, fınalda ataqty Ábilseıit Aıhanovpen beldesken. Odan upaı sanymen utylsa da Amangeldi aǵa Pavlodar oblysynyń paıdasyna kúmis júldeni oljalaıdy.
Bıyl 17-shi ret ótkizilgen dástúrli dodaǵa Astana, Petropavl, Qostanaı, Kókshetaý, Semeı, О́skemen, Stepnogor qalalarynan jáne Pavlodar óńirinen 350-ge jýyq jas balýan jınalyp, er balalar 14, qyzdar 9 salmaq dárejesinde kúsh synasty.
– Týrnırdiń oıdaǵydaı uıymdastyrylýyna oblysymyzdaǵy grek-rım, erkin jáne áıelder kúresi federasııasy, aǵaıyndy kásipker Sádýaqasovtar, oblystyq kásipodaq uıymdary demeýshilik jasady. Meniń dańqty shákirtterim, kúres bapkerleri Orazaly Muhametálinov, Nurlan Orazalınov qurmetti meıman retinde London olımpıadasynyń qola júldegeri Dáýlet Shabanbaı ashylý saltanatyna qatysyp, abyroıymdy asyrǵany úshin alǵysym zor. Jas ulandar jaqsy daıyndyqpen kelgeni kórinip tur, ásirese, joǵarǵy salmaqtaǵy sportshylardyń aıaq alysy unady. Bul týrnırdi respýblıkalyq deńgeıge kótergimiz keledi, – deıdi ardager sportshy.
Saıys jeńimpazdary men júldegerleri estelik syılyqtarmen, kýboktarmen, medaldarmen jáne gramotalarmen marapattaldy. Jarystyń bas tóreshisi Ernazar Qasqyrbaıuly olardyń barlyǵy Ekibastuz qalasynda ótkiziletin respýblıkalyq týrnırge joldama alatynyn atap ótti. Jalpy, aımaqtardaǵy sport mektepterinde jattyǵatyndardyń deni aýyl balalary ekeni aıqyn. Mundaı aımaqtyq ashyq básekeler arqyly jasóspirimderdiń arasynan myqtylary irikteledi.
PAVLODAR