Qarasha týǵaly Kerekýde qystyń yzǵary aıqyn sezile bastady. Mundaǵy kópqabatty úıler men áleýmettik nysandardy jylytý maýsymy qyrkúıekte bastalyp ketse de, óńirdegi qazandyqtar men jylý júıeleriniń keıbirinde jóndeý jumystary áli tolyq aıaqtalmaǵan. Ásirese Ekibastuzdaǵy jylý-elektr ortalyǵynyń máselesi tolyq sheshimin tappaǵany kómirli shahardyń jurtyn alańdatyp otyr.
О́ndiristik qural-jabdyǵy ábden tozyp, tóbesinen sý sorǵalaǵan Ekibastuzdaǵy jylý-elektr ortalyǵynyń aldaǵy qysta qalany jylýmen qamtýy úlken máselege aınalatyny týraly gazet betinde birneshe márte jazǵan edik. Kásiporyn ıeleri shyǵyny bastan asyp ketken ortalyqty saqtap qalýdyń jalǵyz joly retinde ony memleket balansyna basy bútin tegin bere salýǵa daıar ekenin de málimdegen. Deı turǵanmen oblys bıligi ony kommýnaldyq menshikke qabyldaýdan bas tartty. Aksıonerlerdi qyspaqqa alyp, aqyr-sońy tamyz aıynyń sońyn ala stansada jóndeý jumystary qolǵa alynǵan edi.
«Ekibastuzjylýenergo» JShS-nyń basshysy Pavel Melnıchýk qysqa ázirlik sapasy ótken jylǵa qaraǵanda aıtarlyqtaı tómen bolaryn moıyndap otyr. Sebebi jóndeý jumystary óte kesh bastaldy. «Pavlodarenergo» AQ-nyń ekibastuzdyq enshiles kompanııaǵa asa janashyrlyq tanytpaı otyrǵany da aıqyn.
О́ńirlik energetıka jáne turǵyn úı-kommýnaldyq sharýashylyǵy basqarmasynyń basshysy Erjan Salhanov «Ekibastuzjylýenergo» JShS-ynda Úkimet nusqaýymen qurylǵan arnaıy jumys toby áreket etip jatqanyn, onyń nátıjesinde qorytyndylar shyǵarylyp, óndiris nysanyn jańartýdyń naqty sharalary qolǵa alynatynyn atap ótti.
– Qazirgi sátte Ekibastuzdaǵy jylý ortalyǵy qalany jylýmen tolyq qamtyp tur. Jylýǵa qosýǵa qatysty barlyq jumys ýaqytynda aıaqtaldy. Endi jylý berý maýsymynyń naǵyz sharyqtaý shegine daıyndyq jumystary pysyqtalýda. Negizgi júkteme qańtar aıyna túsetini málim. «Pavlodarenergo» AQ bul boıynsha mindetti daıyndyǵyn júrgizýde, – deıdi ol.
Aksıonerlik qoǵamnyń bas dırektorynyń mindetin atqarýshy Vadım Lesın №14 qazandyqta sońǵy jóndeý jumystary aıaqtalyp qalǵanyn aıtady. Qazir peshti oqshaýlaý sharalary júzege asýda. Qosymsha jabdyqtardyń barlyǵy qysqy kezeńge daıyn tur. Búginde jylý ortalyǵynyń shatyry da bútindelýde. Merdiger fırma aıaz túskenshe ózine júktelgen jumysty aıaqtap shyǵýǵa tyrysady.
– О́ńirdiń elektrmen jabdyqtaý salasynda mamandar tapshylyǵy aıqyn sezilýde. Mysaly, Pavlodar qalasyndaǵy kásipornymyzda jumys shtattarynyń 15 paıyzy, Ekibastuzda 25 paıyzy bos tur. Qyzmetkerlerimiz eńbekaqynyń az ekenine jıi shaǵymdanady. Sondyqtan bul tyǵyryqtan shyǵýdyń joly retinde jańa tarıftik baǵalardy ýákiletti organǵa usyndyq. Bizdiń usynysymyz ázirshe qarastyrylyp jatyr. Qandaı baǵa usynyp otyrǵanymyzdy aıta almaımyn, naqty tarıftik júıeni memlekettik jaýapty organdar belgileıtin bolady. Eger tarıftik saıasat bizdiń kóńilimizden shyǵatyndaı retpen qabyldansa, kásiporyndaǵy áleýmettik ahýaldy kóterip, eńbekaqyny ósiremiz. Sáıkesinshe kadrlar máselesin sheshemiz, – deıdi V.Lesın.
Jalpy, qazirgi kúni Pavlodar oblysynyń aýmaǵynda 14 energoblok, 20 qazandyq pen 13 týrbına iske kirisken. Bul úlken shaharlardaǵy jylýmen jabdyqtaý nysandaryndaǵy jaǵdaı. Taǵy 9 qazandyq pen 1 týrbına rezervte tur. Energııa ortalyqtarynda 1 mln 443,6 myń tonna kómir men 15 myń tonna mazýt saqtaýly. Osynshama kólemdegi otyn qory strategııalyq jylý nysandarynyń 10 táýlik boıy kidirissiz jumys isteýine jetkilikti eken.
– Búginde óńirde turmystyq kómirmen qamtý sharalary da oıdaǵydaı júrgizilip jatqanyn atap ótýge bolady. Aldaǵy kezeńde óńir halqyna 430 myń tonna kómir qajet. Qazirge deıin 360 myń tonnasy úılerge deıin jetkizilgen. Bıýdjettik uıymdardy qatty otynmen qamtamasyz etý 96 paıyzǵa oryndaldy. «Bogatyr Kómir», «Maıkóben-Vest» sekildi kómir kenishterimen, temirjol tuıyqtarynda ornalasqan «Elıt kz», «A Vest-Pavlodar», «Daman Group» jáne «Ihsan Group Kz» seriktestikterimen baǵany ustap turý boıynsha memorandým jasaldy, – deıdi Erjan Salhanov.
Kerekýdiń temirjol tuıyqtaryndaǵy bólshektik baǵa kómirdiń tonnasy úshin shamamen 9 myń teńgeden 20 myń teńgege deıin jetip tur. Qazirgi kúni «Maıkóbe» kenishinen turǵyndar kómirdiń tonnasyn 7 500 teńgeden satyp ala alady. Kómir «Sarykól» kenishinde – 6 500, «Bogatyr Kómirde» 3 040 teńgeden bosatylýda. Budan bólek kópshilik «Qarajyra» kómiriniń tonnasyn 8 300, «Shubarkóldikin» 5 501 teńgeden alyp jatqany baıqalady.
Aıtpaqshy kommýnaldyq-turmystyq kómirdi Halykbank usynǵan «halykmarket» qosymshasy arqyly 24 aıǵa bólip tóleýmen satyp alýǵa bolady. Qysqy otyndy nesıege nemese bólip satyp alý kezinde kómir tıeý tuıyǵynan jetkizý qarastyrylmaǵan. Sebebi satyp alýshy ónimdi alatynyn rastaý úshin, sonymen qatar taýardyń sapasyna tolyq kóz jetkizý maqsatynda nesıeni rásimdegen kómir bazasyna, ıaǵnı satýshyǵa kelýge tıis. Sáıkesinshe, jetkizý baǵasy mejeli pýnkttiń qashyqtyǵyna baılanysty esepteledi. Máselen, Pavlodar qalasy boıynsha ortasha jetkizý quny 5 myń teńgeden bastalady. Ázirge óńir boıynsha marketpleıs arqyly kómir satyp alǵandar tirkelgen joq.
Pavlodar oblysy