Elordanyń Bas josparynda qala turǵyndary men qonaqtary bos ýaqytyn jaıly jáne densaýlyǵyna paıdaly túrde ótkize alatyn jańa tartymdy oryndar týraly aıtyldy, dep habarlaıdy Egemen.kz qala ákimdiginiń resmı saıtyna silteme jasap.
Máselen 2023 jyly Úrker (Ilınka), Telman eldi mekenderinde, Sh.Aıtmatov kóshesi aýmaǵynda, J.Táshenov pen T.Hýseın kósheleriniń qıylysynda, Abaı dańǵylynda gúlzarlardy abattandyrý josparlanyp otyr. Sol sııaqty Abylaıhan dańǵylynyń boıynda, Kúıshi Dına kóshesinen Mustafın kóshesine deıingi aralyqta, Júrgenov kóshesi, 28/1, Qoshqarbaev kóshesi, 45, Qordaı jáne Taıqazan kósheleriniń qıylysynda, K.Ázirbaev kóshesi, 10-14 jáne t.b. mekenjaılarda alleıa bolady. Aıta ketý kerek, sońǵy jyldary Astanada jyl saıyn 200-den astam aýla men qoǵamdyq keńistik (saıabaqtar, gúlzarlar, jelekjoldar) abattandyrylýda.
Sonymen qatar Úlken jáne Kishi Taldykól boıynda ekoparkter salynady. Ekopark jobasy aýmaqty abattandyrýdy, Úlken jáne Kishi Taldykól sý balansyn saqtap ári tolyqtyra otyryp, rekreasııalyq aımaq salýdy kózdeıdi. Sý aıdyndary salynady, olar sýmen qamtamasyz etiledi. Bul sýdyń tepe-teńdigin saqtaýǵa jáne sýdyń tabıǵı túrde súzilýin jasaýǵa, ekojúıeniń bıoártúrliligin saqtaýǵa múmkindik beredi. Buǵan deıin Kishi Taldykól aýdanynda saıabaqtyń relefin qurý jáne aǵash otyrǵyzý úshin aýmaqty daıyndaý jumysy bastalǵan bolatyn. Sol sııaqty Úlken Taldykól mańynda qoryq jáne orman-saıabaq aımaǵy bar eldegi alǵashqy tabıǵı park ashylady.
Aıta ketsek, sońǵy jyldary Astanada 900-den astam aýla men qoǵamdyq keńistik abattandyryldy. Bıyl Beıbitshilik jáne kelisim saraıy aýmaǵynda amfıteatr, qalanyń oń jaǵalaýynda taǵy bir jaıaý júrginshiler joly, «Vstrecha» saýda úıi janyndaǵy qoǵamdyq keńistik, «Beıbitshilik jáne kelisim» saıabaǵy, qalalyq alań salyndy.
Astananyń Bas josparynyń jobasy talqylaý kezeńinde tur. Qalanyń Bas josparynyń jobasyn talqylaý 2022 jylǵy 15-18 qarasha aralyǵynda «Astana bas jospary» ǴZJI» JShS ǵımaratynda, Astana qalasy, Á.Mambetov k-si, 22, kórme zaly meken-jaıynda ótedi.