«Qarasora» respýblıkalyq jedel-profılaktıkalyq is-sharasyn ótkizý kezinde Ekstremızmge qarsy is-qımyl basqarmasynyń qyzmetkerleri О́rel aýyly QMShJ bastyǵynyń orynbasarymen jáne Katonqaraǵaı aýdanynyń polıseılerimen birlesip esirtki saqtady degen kúdikpen Barlyq aýylynyń 36 jastaǵy turǵynyn ustaǵan, dep habarlaıdy Egemen.kz.
Tártip saqshylary jaqyn mańdaǵy eldi mekennen 10 shaqyrym jerde ornalasqan kúdiktige tıesili omartaǵa shuǵyl tintý júrgizgen. Onda saraıdyń tóbesinde jáne eden sórelerinde polısııa qyzmetkerleri ósimdik tektes jasyl tústi zaty bar birneshe banka, sómkeler men qaǵaz oramdaryn tapqan.
«Saraptama qorytyndysyna sáıkes, zat salmaǵy 1 kg 76 gramm «keptirilgen marıhýana» esirtki quralyna jatady. Ustalǵan adamǵa qatysty kelýge mindetteý túrindegi prosestik májbúrleý sharasy tańdaldy. Atalǵan fakti boıynsha QR QK-niń 296-baby 4-bóligi boıynsha sotqa deıingi tergeý júrgizilýde», delingen ShQO PD baspasóz qyzmetiniń habarlamasynda.