Búgin Londonda jergilikti ýaqyt boıynsha saǵat 07:00-de Qazaqstannyń Ulybrıtanııa jáne Soltústik Irlandııa Birikken Koroldigindegi Elshiliginde №244 saılaý ýchaskesi saltanatty túrde ashyldy, dep habarlaıdy Egemen.kz.
Bul saılaý ýchaskesinde Ulybrıtanııa men Soltústik Irlandııada, sondaı-aq Irlandııa men Islandııadanyń turaqty nemese ýaqytsha turǵylyqty orny bar, kámeletke tolǵan Qazaqstannyń azamattary daýys bere alady.
Vestmınster ýnıversıtetiniń ekinshi kýrs stýdenti Álııa Ábdisalyq Londondaǵy saılaý ýchaskesine birinshi bolyp kelgen saılaýshylardyń biri boldy.
«Meniń saılaý ýchaskesine erte kelýime patrıotızm sebep boldy. Biz tańdaǵan el Prezıdenti elimizdegi jaǵdaıdy jaqsy jaqqa ózgertedi dep oılaımyn», dedi Álııa Ábdisalyq.
Daýys berý jergilikti ýaqyt boıynsha 20:00-ge deıin (Astana ýaqyty boıynsha 02:00) ótedi. Daýys berý bıýlletenderi sanalyp bolǵannan keıin daýys berý nátıjeleri bar qajetti qujattar Ortalyq saılaý komıssııasynyń poshtasyna jiberiledi.