Pavlodar oblysynda táýelsiz baıqaýshylar shtaby turaqty negizde áreket etýde, dep habarlaıdy Egemen.kz.
«Partııalyq emes baıqaý ortalyǵy» RQB Pavlodar oblysy boıynsha fılıalynyń músheleri saılaý ýchaskelerinde tańǵy 6.00-den jumysqa kirisken.
Kezekten tys QR Prezıdentiniń saılaýyna monıtorıng júrgizý maqsatynda óńirdegi birneshe úkimettik emes uıym birigip áreket etýde. Atap aıtqanda, «Qaısar KZ», «NAMYS PVL» qoǵamdyq birlestikteri jáne Aýǵan soǵysynyń ınternasıonal jaýyngerleri qoǵamynyń músheleri oblystyń 507 ashyq saılaý ýchaskelerinde baqylaý jumystaryn júzege asyrýda.
Osy oraıda «Partııalyq emes baıqaý ortalyǵy» RQB Pavlodar oblysy boıynsha fılıalynyń tóraǵasy Alma Qozbaevany sózge tarttyq.
«Bizben belsendi azamattyq pozısııaǵa ıe 2000-nan astam adam jumys istep jatqanyn atap ótkim keledi. Ortalyq músheleri saılaý prosesine esh bóget jasamastan ýchaskelerdegi jaǵdaıdy baqylap, barlyq daýys berý sharalarynyń zań sheńberinde júzege asyp jatqanyna kóz jetkizýde.
Qazirgi tańda saılaý naýqany bizdiń saıası ómirimizdiń ajyramas bóligi. Qazaqstandyqtar barlyq deńgeıdegi saılaý prosesterine, atap aıtqanda, aýyl ákimderi, barlyq deńgeıdegi máslıhat jáne Májilis depýtattary saılaýyna belsene qatysatynyn baıqap kelemiz. Buıyrtsa, aldaǵy ýaqytta aýdan ákimderin saılaýǵa qol jetkizemiz.
Kezekten tys Prezıdent saılaýy asa jaýapkershilikti qajet etedi. Bizdiń árqaısymyzdyń daýysymyz tutas eldiń bolashaǵy úshin asa mańyzdy ekenin kópshilik uǵynyp, daýys berýge belsene kelip jatyr. Sebebi Qazaqstan – bizdiń ortaq shańyraǵymyz.
Baıqaýshylar tańǵy saǵat 6.00-den bastap óz jumystaryna kiristi, olar baqylaý sharalaryn ýchaskelerdegi komıssııanyń hattamasy qoldaryna tıgende baryp toqtatady. Tań qarańǵysynan daýys berý oryndarynyń talapqa saı bolýy tekserildi. Buǵan deıingi saılaý naýqandaryna da qatysqan edik. Olarmen salystyrǵanda búgingi saılaýda saılaý komıssııalarynyń daıyndyǵy óte myǵym, qyzmetkerlerdiń jaýapkershiligi artqany baıqalyp otyr. Ázirge Pavlodar oblysyndaǵy saılaý ýchaskelerinde zań buzýshylyq tirkelmegenin atap ótýge bolady», deıdi fılıal tóraǵasy.