Pavlodar oblysynda 1 200 bas iri qaraǵa arnalǵan taýarly sút fermasy iske qosyldy. Joba segiz aı ishinde júzege asyrylyp, zamanǵa saı tehnologııalarmen jaraqtaldy. Munda kúnine 30 myń lıtr sút saýylmaq.
«AgroTrade PV» JShS-nyń jańa taýarly sút fermasy Pavlodar aýdanyndaǵy Olgıno aýylynda ornalasqan. Fermerlik sharýashylyq dırektory Qýanysh Temirǵalınniń aıtýynsha, munda kúnine 30 myń lıtrge deıin sút óndirý josparlanyp otyr. Al kásiporyn tolyq qýattylyq deńgeıine shyqqan kezde jylyna 10 myń tonna sút saýylmaq.
Ferma kesheninde 100-ge jýyq jańa jumys orny quryldy, qyzmetkerlerdiń negizgi bóligin jergilikti turǵyndar qurap otyr. Munda sút sharýashylyǵynan bólek kartop, dándi daqyldar men mal azyǵy ósiriledi. 1 700 gektar sýarmaly alqaptar sharýashylyqta ustalatyn túlikke qajet jem-shópti ósirýge jetkilikti.
– Qazir bizde Danııadan ákelingen golshtın-frız tuqymdy 476 bas iri qara bar. Taǵy da qosymsha 1 200 bas sıyr satyp alý josparlandy. Joba memlekettiń qoldaýymen júzege asyryldy. 40 sıyrǵa shaqtalǵan saýyn blogy ornatyldy. О́ndiristiń avtomattandyrylǵan prosesi jáne sút baǵytyndaǵy asyl tuqymdy sıyrlardyń bolýy joǵary kórsetkishterge qol jetkizýimizge múmkindik beredi, – dedi Qýanysh Temirǵalın.
Bul fermanyń nátıjesinde óńirdegi sút óndirisi qosymsha 10 myń tonnaǵa ulǵaıyp, jergilikti naryqty sút ónimderimen qamtý kórsetkishi ósedi. Pavlodar oblysynda sońǵy úsh jyldyń ishinde 14 taýarly sút fermasy ashylǵan. Aldaǵy úsh jylda 100-den astam ınvestısııalyq jobany qarjylandyrý kózdelip otyr.
– Mal sharýashylyǵy, sonyń ishinde sút sharýashylyǵyn damytýǵa búginde kóp kóńil bólinýde. О́zimizdiń aǵarǵanmen jergilikti naryqty barynsha qamtyp, ımporttyq ónimderdi shekteý máselesin Memleket basshysy mindet etti. Sol údeden kórinýdiń bir kórinisi – búgin ashylyp otyrǵan taýarly sút fermasy. Aldaǵy eki jylda óńirde taǵy osyndaı 8 ferma salynady degen jospar bar. Nátıjesinde sút baǵytyndaǵy asyl tuqymdy sıyrlar sany 6 myń basqa ulǵaıyp, sút óndirý 43 myń tonnaǵa jetpek. Aýyl sharýashylyǵy salasyndaǵy qarqyndy damýǵa Ertis ózeniniń jaqyn ornalasýy da úlken sebep bolýda. О́zen sýyn paıdalanyp, sýarmaly jerlerdiń sanyn arttyrýǵa úlken qadamdar jasalýda. Qazirgi kúni sýarmaly alqaptar 142 myń gektarǵa jetti, – dep atap ótti oblys ákimi Ábilqaıyr Sqaqov.
Keıingi úsh jylda oblystaǵy aýyl sharýashylyǵy óndirisiniń tıimdiligi 4,5 esege artqan. Al 2020 jyldan beri salada shyǵarylǵan ónimniń jalpy kólemi 1,8 esege ósti. Qazirgi ýaqytta aımaqta jalpy sany 37 taýarly sút fermasy jumys istep tur.
Pavlodar oblysy,
Pavlodar aýdany