Senat depýtaty Serik Shaıdarov qurylys materıaldarynyń barlyq túri is júzinde 50 paıyzǵa qymbattaǵanyn aıtty, dep habarlaıdy Egemen.kz.
«Esep komıtetiniń málimeti boıynsha, qurylys nysandarynyń smetalyq qujattamasynda turǵyn úı qunynyń 65 paıyzyn qurylys materıaldary quraıdy. Sondyqtan naryqtaǵy kez kelgen aýytqý, qurylys salasynyń damýy qurylystyń qunyna ǵana emes, turǵyn úı qurylysynyń qarqynyna da tikeleı áser etedi», dedi Serik Shaıdarov Senatta ótken Úkimet saǵatynda.
Senatordyń aıtýynsha, Qazaqstanda joǵary óńdelgen ónim shyǵaratyn kásiporyndar jetkiliksiz.
«Ulttyq statıstıka bıýrosynyń málimetinshe, 18 negizgi qurylys materıaldary boıynsha ımport úlesi 50%-dan asady. Ishki naryqqa qurylys materıaldarynyń ımporty 2022 jylǵy qańtar-tamyzda 3%-ǵa jýyq ósip, 799,5 mln dollarǵa jetti. Osy kezeńde Qazaqstanda qaptama keramıkalyq kirpish, beton buıymdary, sılıkat jáne qoj kirpish, portlandsement, qurama qurylys konstrýksııalary, daıyn beton óndirisi fızıkalyq túrde tómendedi», dedi depýtat.
Serik Shaıdarov 2025 jylǵa deıingi qurylys ındýstrııasy jobalaryn egjeı-tegjeıli júzege asyrý boıynsha Jol kartasyn bekitkenderin eske saldy. 157 jobany júzege asyrý josparlanýda.
«Endi Indýstrııa jáne ınfraqurylymdyq damý mınıstrligi ákimdiktermen birlese otyryp, josparlanǵan barlyq jobalardy qısyndy qorytyndyǵa jetkizip qana qoımaı, sonymen qatar óńirler men oblystar deńgeıinde qurylys materıaldaryna degen qajettilikti tolyq qamtýdy qamtamasyz etý mańyzdy», dedi S. Shaıdarov.