Qazaqstan Ulttyq bankiniń habarlaýynsha, sıfrlyq teńge týraly jalǵan aqparattar taralyp jatyr. Bul rette Tólem jáne qarjy tehnologııalaryn damytý ortalyǵy mundaı alaıaqtyq áreketterden saq bolýǵa shaqyrady.
Sıfrlyq teńge tóńireginde qyzyǵýshylyq artqandyqtan alaıaqtar joba týraly aqparatty teris maqsatta paıdalanyp, jurtty adastyrýǵa kóshti. Messendjerler de jańalyqtar shyǵarylymy formatynda qolma-qol aqshany sıfrlyq teńgemen aýystyrý týraly feık aqparattar men vıdeorolıkter tarap jatyr. Al sıfrlyq teńge jobasyna ınvestısııa salýdy jarnamalaýshylar alaıaqtyqty iske asyratyn saıttardy jasaýǵa kóshken. Bul habarlamalardyń barlyǵy da shyndyqqa janaspaıdy.
«Sıfrlyq teńge qolma-qol jáne qolma-qol aqshasyz aýdarymdardyń ornyn aýystyrý úshin shyǵarylmaǵan, ol qoldanysta qatar júretin bolady. Sıfrlyq valıýta biregeı tehnologııalyq sıpattamalardyń arqasynda Qazaqstannyń Ulttyq tólem júıesin odan ári damytýdy kózdeıdi, onyń ishinde ınternetsiz tólem jasaý múmkindigi de paıda bolady. Qazir «Sıfrlyq teńge» jobasy ázirleý jáne synaqtan ótkizý kezeńinde tur. Ulttyq sıfrlyq valıýtany engizý boıynsha naqty sheshim osy jyldyń sońyna deıin qabyldanady dep josparlanyp otyr. Al Ulttyq bank sıfrlyq valıýtanyń artyqshylyqtary men táýekelderin, onyń aqsha-kredıt saıasatyna, qarjylyq turaqtylyqqa jáne tólem qyzmeti naryǵyna áserin jan-jaqty zerttep jatyr», delingen Ulttyq bank habarlamasynda.
Aıta keteıik, sıfrlyq teńge jobasy týraly resmı aqparat kózi – Ulttyq banktiń (nationalbank.kz) resmı saıty jáne TQTDO-nyń payfintech.kz saıty. О́zge saıttardyń, ásirese «.kz» domendik keńistiginen tys tirkelgen saıttardyń bul jobaǵa esh qatysy joq. Keńes alý úshin Ulttyq banktiń 1477 baılanys ortalyǵyna habarlasýǵa bolady.