Búgin elordada aýyl jastarynyń IV forýmy aıaqtaldy, dep habarlaıdy Egemen.kz.
Is-sharaǵa «Aýyl» partııasynyń jastar qanatynyń músheleri, aýyl jastarynyń belsendi ókilderi, jastar uıymdarynyń kóshbasshylary, memlekettik organdardyń ókilderi, stýdenttik ombýdsmen qatysty.
Forým jumysyn asha otyryp, «Aýyl» partııasynyń tóraǵasy Álı Bektaev quttyqtaý sóz sóılep, memlekettik sheshimder qabyldaýda jastardyń pikiriniń mańyzdylyǵyn atap ótti.
«Aýyl» halyqtyq-demokratııalyq patrıottyq partııasy tórtinshi jyl qatarynan dástúrli túrde aýyl jastarynyń forýmyn uıymdastyryp keledi. Osy ýaqyt ishinde aýyl jastary eldiń qoǵamdyq-saıası ómirine belsendi qatysa bastady. Bıylǵy forýmnyń ereksheligi, jastar Memleket basshysy Qasym-Jomart Kemeluly Toqaev usynǵan aýyldyq aýmaqtardy damytý tujyrymdamasy úshin óz usynystary men ıdeıalaryn usynady», dep atap ótti Álı Ábdikárimuly.
Forým aıasynda jastar «Aýyl» partııasyn damytý baǵdarlamasyn daıyndaý boıynsha óz usynystaryn usyndy, olar aldaǵy ýaqytta partııanyń baǵdarlamalyq qujattaryna aınalady.
Sondaı-aq is-sharaǵa aýyldyq bıznes ókilderi qatysty. Medısınalyq taýarlar óndirýmen aınalysatyn jas ǵalym, kásipker Almas Muhametov aýylda bıznesti damytý mańyzdylyǵyn atap ótti. Qazir Almas Muhametov medısınalyq buıymdar shyǵaryp, Almaty oblysyndaǵy aýyl turǵyndaryn jumysqa ornalastyrýda.
О́z kezeginde Aqmola oblysy Selınograd aýdany Prırechenka aýyldyq okrýginiń jas ákimi Meıirhat Jandildın aýyldy basqarý tájirıbesimen bólisti.
Aýyl balalarynyń qalada beıimdelýi boıynsha negizgi máseleler qarastyryldy. Forýmǵa qatysýshylar «Dıplommen aýylǵa» memlekettik baǵdarlamasyna ózgerister engizý qajettigi týraly «Aýyl» partııasynyń ustanymymen kelisti.
Is-shara sońynda aýyl jastarynyń máseleleri, aýyl jastaryn damytý jáne qoldaý, elimizde ońtaıly jastar saıasatyn qalyptastyrý máseleleri talqylandy.