Úkimettiń jańa bıýdjet-salyq saıasaty Ulttyq qor aktıvterin $100 mlrd-qa deıin arttyrýǵa múmkindik beredi. Bul týraly Premer-Mınıstr Álıhan Smaıylov Memleket basshysynyń qatysýymen ótip jatqan Úkimettiń keńeıtilgen otyrysynda aıtty, dep habarlaıdy Egemen.kz.
Álıhan Smaıylovtyń aıtýynsha, Úkimet qabyldaǵan sharalar aldaǵy jyldary Ulttyq qorǵa qarajat túsimderiniń kólemin ulǵaıtýǵa jáne bıýdjet shyǵystarynyń ósý qarqynyn turaqtandyrýǵa múmkindik beredi.
Qazir Qazaqstan Prezıdentiniń saılaýaldy baǵdarlamasyn iske asyrý bastaldy. Onyń sheńberinde 2030 jylǵa deıin memlekettik qarjyny basqarýdyń jańa tujyrymdamasy qaǵıdattaryn engizý júzege asyrylyp jatyr. 2023 jyly Ulttyq qordan alynatyn transfertterdi 1,4 trln teńgege qysqartýǵa jáne bıýdjet shyǵystarynyń ósý qarqynyn turaqtandyrýǵa múmkindik beretin kontrsıkldik bıýdjettik qaǵıdalar bekitildi.
«Bıýdjettiń teńgerimdiligi óziniń kiris bazasyn ulǵaıtý jáne shyǵystardy neǵurlym basym baǵyttarǵa shoǵyrlandyrý esebinen qamtamasyz etiledi», dep atap ótti Premer-Mınıstr.
Bıýdjet prosesi men salyqtyq ákimshilendirýdi jeńildetýge, osy baǵyttarǵa jańa sıfrlyq sheshimderdi engizýge múmkindik beretin jańa Bıýdjet jáne Salyq kodeksterin ázirleý bastaldy.
«Jalpy alǵanda, bıýdjet-salyq saıasaty 2030 jylǵa qaraı munaıǵa qatysty emes tapshylyqty 5%-ǵa deıin tómendetýge, sondaı-aq Ulttyq qor aktıvterin $100 mlrd-qa deıin ósirýge baǵyttalady», dedi Álıhan Smaıylov.