Fılıppınde nóser jaýyn saldarynan bolǵan sý tasqynynan 44 adam qaza taýyp, 28 adam iz-túzsiz joǵalyp ketti, dep habarlaıdy Egemen.kz TASS-qa silteme jasap.
Táýekelderdiń aldyn alý jáne tabıǵı apattardy joıý jónindegi ulttyq keńestiń juma kúni jarııalanǵan baıandamasynda atap ótilgendeı, sý tasqynynan respýblıkanyń 10 óńirinde 509,3 myńnan astam adam zardap shekti.
Vedomstvonyń málimetinshe, 151 evakýasııalyq pýnktte 15,8 myń adam qonys aýdarǵan. Kem degende 1,42 myń adam úılerin tastap ketken, 12 adam túrli dene jaraqattaryn alǵan. Respýblıkanyń toǵyz oblysynda sý tasqyny men kóshkinderdi qosa alǵanda, 434 apatqa baılanysty oqıǵa tirkeldi.
4,5 myń úı 54,9 mıllıon pesoǵa (983,4 myń dollar) zııan shekti. 95 ınfraqurylym nysanyna keltirilgen zalal 1,13 mıllıard pesoǵa (20,2 mıllıon dollar), aýyl sharýashylyǵyna 232,7 mıllıon pesoǵa (4,16 mıllıon dollar) baǵalanǵan. Sý tasqyny 129 jol men 14 kópirdi, 19 teńiz portyn zaqymdady. 63 qalada elektr qýatynyń úzilýi tirkeldi, biraq 60 qalada ol qalpyna keltirildi.
67 qala men 71 mýnısıpalıtette oqý oryndaryndaǵy sabaqtar men kásiporyndardaǵy jumys toqtatyldy. 21 eldi mekende tótenshe jaǵdaı rejımi engizildi. Úkimet kómekke 51,4 mıllıon peso (920,8 myń dollar) bóldi.