Byltyr jyl basynan qazan aıyna deıingi aralyqta aqsha aýdarymdarynyń halyqaralyq júıesi arqyly shet memleketterden kelgen qarjy kólemi 575,2 mlrd teńge boldy. 2021 jyldyń qańtar-qazanymen salystyrǵanda kórsetkish 2,5 esege joǵary.
Tranzaksııa sany 46,7 paıyzǵa, 1,4 mln-ǵa, al bir aýdarymnyń ortasha chegi 68 paıyzǵa ósip, 414,1 myń teńgeni quraǵan. Aldyńǵy jyly bul kórsetkish 246,5 myń teńge bolǵan. Ásirese Reseıden keletin aqsha aǵyny ájeptáýir artqan. 2022 jyldyń qańtar-qazan aılarynda RF-dan elimizge 305,7 mlrd teńge aýdaryldy. Bul – aldyńǵy jylǵydan 6,7 esege kóp soma. Osylaısha, RF-dan keletin aqsha aýdarymdary jalpy aýdarym úlesinde 19,6-dan 53,1 paıyzǵa ósken.
Bir qyzyǵy, byltyr qańtar, aqpan jáne naýryz aılarynda RF-dan Qazaqstanǵa aýdarym kólemi 2021 jylǵy kórsetkishten tómen bolyp turǵan. Biraq Ýkraınada soǵys bastala salysymen kórsetkish kúrt ósken jáne shyrqaý shegine maýsymda jetken – 66,9 mlrd teńge. Shildede Reseıden Qazaqstanǵa jiberilgen aqsha kólemi – 54,6 mlrd teńge, tamyz ben qyrkúıekte – 33,2 jáne 36 mlrd teńge boldy. Reseıde qyrkúıektiń sońynda mobılızasııa bastalǵan soń bizge jiberiletin aqsha aýdarymdarynda taǵy da ósim baıqalǵan. О́sim 18,6 paıyzǵa kóbeıip, 42,7 mlrd teńgege jetipti.
Sonymen birge aıtarlyqtaı aqsha kólemi Qyrǵyzstan (82,7 mlrd teńge), О́zbekstan (42,4 mlrd teńge), AQSh (38,1 mlrd teńge) jáne Ońtústik Koreıadan (33,1 mlrd teńge) kelip túsken. Kóp rette aqsha jiberýshiler reseılik «Zolotaıa Korona» halyqaralyq aýdarym júıesin paıdalanǵan. Osy júıe arqyly elimizge 406,5 mlrd teńge qarajat jiberildi. Odan keıingi oryndarda Western Union (68,1 mlrd tg), MoneyGram (46,2 mlrd tg), Contact (36 mlrd tg) jáne «Iýnıstrım» (16,2 mlrd tg) júıeleri tur. Taǵy 2,2 mlrd teńge basqa júıeler arqyly aýdarylǵan.