Bas prokýror Berik Asylov qańtar oqıǵasynyń basty uıymdastyrýshylary týraly saýalǵa jaýap berdi, dep habarlaıdy Egemen.kz.
Májilis otyrysynan keıin Bas prokýror jýrnalısterdiń saýaldaryna jaýap berdi.
«Qańtar oqıǵasy búkil halyq úshin qasiret boldy. Bunyń barlyǵy aldyn ala josparlanǵany da belgili. Uıymdastyrýshylar, onyń ishinde uıymdasqan qylmystyq toptar, ekstremıster, sonyń ishinde terrorıstik uıymdar uzaq ýaqyt boıy daıyndalǵan. Terrorıstik áreketter boıynsha eki qylmystyq isti sotqa jiberdik», dedi Berik Asylov.
Bas prokýrorǵa «Kárim Másimovty basty uıymdastyrýshy dep esepteýimizge bola ma?» degen suraq qoıyldy.
«Memlekettik tóńkeris boldy. Basty uıymdastyrýshylar, joǵaryda aıtqanymdaı, Ulttyq qaýipsizdik komıtetiniń birinshi basshylaryna – Másimovke, onyń ishinde depýtattarǵa da qatysty qylmystyq is qozǵaldy», dedi Asylov.
BAQ ókilderi «Tergeý boıynsha Másimov basty uıymdastyrýshy ma?» dep surady.
«Iá, solaı aıtýǵa bolady», dep jaýap berdi Bas prokýror.