Saýda jáne ıntegrasııa mınıstrliginiń alqa májilisinde ortalyq memlekettik organdar basshylarynyń, Parlament Májilisi depýtattarynyń, salalyq odaqtar, qaýymdastyqtar men kompanııalar ókilderiniń qatysýymen mınıstrliktiń 2022 jylǵy jumys qorytyndylary men aldaǵy kezeńge arnalǵan josparlary talqylandy, dep habarlaıdy Egemen.kz Premer-mınıstrdiń baspasóz qyzmetine silteme jasap.
Premer-mınıstr Álıhan Smaıylovtyń tóraǵalyǵymen ótken alqa májilisine qatysýshylar ishki jáne syrtqy saýdany damytý, ónerkásip kooperasııasy jáne logıstıka, Ulttyq taýar ótkizý júıesin qurý, sıfrlandyrý jáne shıkizattyq emes eksportty damytý máselelerin qarady.
Premer-mınıstr óz sózinde bıyl syrtqy saýda aınalymy men ishki saýdanyń oń dınamıkasyn saqtaı otyryp, Memleket basshysynyń Saılaýaldy baǵdarlamasynda, Qazaqstan halqyna Joldaýlarynda jáne Úkimettiń keńeıtilgen otyrystarynda belgilegen mindetterin iske asyrýǵa barlyq kúsh-jigerdi jumsaý qajettigin atap ótti.
Álıhan Smaıylov áleýmettik mańyzy bar azyq-túlik taýarlary baǵasynyń turaqtylyǵyn qamtamasyz etý jónindegi jumysqa erekshe nazar aýdardy.
«Halyq úshin bul jumystardyń mańyzy óte zor jáne ol Memleket basshysynyń erekshe baqylaýynda. Baǵa belgileýge kóptegen faktorlar áser etedi, sondyqtan deldaldyq áreketterdi anyqtap, ruqsat etilgen saýda ústemesiniń saqtalýyna monıtorıng júrgizý jáne baǵanyń negizsiz kóterilý faktilerine qarsy sharalardy kúsheıtý qajet», dedi Úkimet basshysy.
Sonymen qatar Premer-mınıstr saýda alańdaryn odan ári jańǵyrtýdyń, zamanaýı formattardy engizýdiń jáne jańa fýnksıonaldy kókónis qoımalaryn salýdyń mańyzdy ekenin atap ótti.
«Osy saladaǵy standarttardy arttyrýǵa umtylýymyz kerek, óıtkeni bul baǵany ustap turýǵa jáne adal kásipkerlerdiń tabysyn arttyrýǵa yqpal etedi. Bul baǵytta jumys isteımiz», dedi Álıhan Smaıylov.
Qorytyndylaı kele, Úkimet basshysy Ulttyq taýar ótkizý júıesin qurý eldegi taýarlardyń baǵasy men balansyn taldaýdyń tıimdiligin arttyrýǵa múmkindik beretinin atap ótti. Bul saýda prosesterin jedel retteý úshin óte qajet. Á. Smaıylovtyń aıtýynsha, barlyq saýda sýbektisi qyzmetiniń prosesterin avtomattandyrý jáne Ulttyq taýar ótkizý júıesin memlekettik organdar men saýda qyzmetine qatysýshylardyń aqparattyq júıelerimen tolyqqandy ıntegrasııalaýdy júrgizý mańyzdy.