Premer-mınıstr Álıhan Smaıylov Eńbek jáne halyqty áleýmettik qorǵaý mınıstrliginiń keńeıtilgen alqa májilisin ótkizdi. Onda vedomstvonyń 2022 jylǵy jumysynyń qorytyndylary jáne aldaǵy kezeńge arnalǵan mindetteri qaraldy, dep habarlaıdy Egemen.kz Úkimettiń baspasóz qyzmetine silteme jasap.
EHÁQM basshysy Tamara Dúısenova memlekettiń áleýmettik mindettemelerdi oryndaýy, jańa jumys oryndaryn qurý jáne azamattardy jumysqa ornalastyrý jónindegi baǵdarlamalardy iske asyrý, kásiporyndardaǵy eńbek daýlaryn sheshý, «Otbasynyń sıfrlyq kartasyn» engizý jáne t. b. týraly baıandama jasady.
Premer-mınıstr óz sózinde Úkimet áleýmettik salany nyǵaıtý boıynsha júıeli túrde jumys júrgizip jatqanyna toqtaldy. Atap aıtqanda, zeınetaqylar men járdemaqylar ýaqytyly tólenip, áleýmettik mindettemeler oryndalýda. Eńbekke qabiletti halyqtyń tabysyn arttyrý, az qamtylǵan azamattardy ataýly kómekpen qamtý, jumysqa turǵyzý baǵytynda júıeli sharalar qabyldanyp jatyr. Sonymen qatar jańa sıfrlyq quraldar men qyzmetter josparly túrde engiziledi.
Áleýmettik qorǵaý salasyndaǵy zańnamany keshendi jetildirý úshin Áleýmettik kodekstiń jobasy ázirlenip, Májiliske engizildi.
«Bul – qazaqstandyqtardyń bazalyq áleýmettik quqyqtaryn belgileıtin jáne olardyń ómir súrý sapasyn arttyrýǵa yqpal etetin óte mańyzdy qujat», dedi Álıhan Smaıylov.
Úkimet basshysy Eńbek jáne halyqty áleýmettik qorǵaý mınıstrligi tıisti vedomstvolarmen birlesip, memlekettik qoldaýdy «Otbasynyń sıfrlyq kartasy» arqyly proaktıvti formatqa kezeń-kezeńimen aýystyrýdy jalǵastyrýy qajettigin atap ótti. Osyǵan baılanysty Premer-mınıstr barlyq memlekettik organdardyń aqparattyq júıelerin jańa platformamen ıntegrasııalap, málimetter bazasyndaǵy derekterdi ózektendirý jumystaryn turaqty baqylaýda ustaýdy tapsyrdy.
«Otbasynyń sıfrlyq kartasynyń» taldaý nátıjelerin jergilikti jerlerde jedel áreket etý jáne azamattardyń áleýmettik ál-aýqatynyń deńgeıin arttyrý úshin paıdalanýymyz kerek», dedi Álıhan Smaıylov.
Onyń aıtýynsha, Memleket basshysy halyqty, ásirese jastardy jumyspen qamtyp, olardyń tabysyn arttyrý boıynsha naqty mindetterdi belgiledi. Máselen, 2023 jyly jastar arasynan keminde 100 myń adamdy jumysqa ornalastyryp, jas kásipkerlerge jyldyq 2,5% jeńildikpen kredıt berý qajet.
«Qarajat bólinip, erejeler qabyldandy, osy tapsyrmalardyń sapaly oryndalýyn qamtamasyz etýimiz kerek. Naqty ındıkatorlar memlekettik organdardyń damý josparlarynda jáne óńirlik jumyspen qamtý kartalarynda kórsetilýi tıis. Bul rette turaqty jumys oryndaryn qurýǵa basa nazar aýdarý qajet», dedi Álıhan Smaıylov.
Sonymen qatar Premer-mınıstr jumyspen qamtý ortalyqtaryn transformasııalaý boıynsha pılottyq jobany qoldady. Alaıda Úkimet basshysynyń aıtýynsha, qurylymdy jańartýmen qatar, motıvasııa beretin «nátıje úshin» eńbekaqy tóleý formatyna kóshý qajet: jumysqa ornalasqan azamattar neǵurlym kóp bolsa, jumyspen qamtý ortalyqtary qyzmetkerleriniń jalaqysy soǵurlym joǵary bolmaq.
Oǵan qosa, Álıhan Smaıylov shetelde jumys isteıtin qazaqstandyqtardyń quqyqtaryn qorǵaýǵa, «bir tereze» qaǵıdaty boıynsha qandastardy qabyldaý prosesin jetildirýge, qyzmetkerlerdi kásibı sertıfıkattaý júıesin engizýge, sondaı-aq múgedektigi bar adamdar men zııandy eńbek jaǵdaılarynda jumys isteıtin azamattardy áleýmettik qorǵaýǵa erekshe nazar aýdarý qajettigin atap ótti.
«Álemdik tájirıbede jazataıym oqıǵalardan saqtandyrý ótemaqy berýden basqa, profılaktıkalyq jáne ońaltý fýnksııalaryn da qarastyrady. Jumyspen qamtylǵandardy áleýmettik saqtandyrý jáne zeınetaqymen qamsyzdandyrý júıesine tartý boıynsha qarjy ınstıtýttarynyń jumysy mardymsyz. Eńbek jáne halyqty áleýmettik qorǵaý mınıstrligi ýákiletti memlekettik organdarmen jáne qarjy ınstıtýttarymen birlesip, naqty usynystar ázirleýi qajet», dedi Premer-mınıstr.
Mınıstrlikterdiń, ákimdikterdiń basshylary, Parlament Májilisi men Senatynyń depýtattary, salalyq federasııalar men uıymdardyń ókilderi qatysqan alqa májilisinde áleýmettik kásipkerlikti damytý, arnaıy áleýmettik qyzmetter kórsetý, ónerkásip qaýipsizdigin qamtamasyz etý, óńirlik baǵdarlamalardy iske asyrý jáne basqa da máseleler talqylandy.