Jıynda qatysýshylar balalardyń qaýipsizdigin qamtamasyz etý jáne olardyń quqyqtaryn qorǵaý jaıynda pikirlerin ortaǵa salyp, eń ózekti máselelerdi talqylady, dep habarlaıdy Egemen.kz.
Kezdesýde býllıngpen kúres, bilim berý mekemelerin beınebaqylaý kameralary jáne dabyl belgilerimen qamtý, erekshe bilim berý qajettiligi bar balalardyń tehnıkalyq jáne kásiptik bilim alýyna jaǵdaı jasaý, PMPK ashý, tárbıe jumysynda ulttyq qundylyqtardy qalyptastyrýǵa basymdyq berý jáne taǵy basqa usynystar kóterildi.
Sondaı-aq balalardyń qaýipsizdigine jaýapty ózge de vedomstvolarmen yntymaqtastyq ornatyp, tyǵyz baılanysta bolý úshin ortaq alań qurý bastamasy kóterildi. Oqý-aǵartý mınıstri balalardyń múddesin qorǵaý jumysyna qoǵam bolyp jumylyp, birlese jumys isteýge shaqyrdy.
«Elimizde 6,5 mln-nan astam bala bar. Sol sebepti bala quqyqtary jónindegi ýákildermen áriptestik ornatyp, tyǵyz jumys isteý, birlesken jobalardy júzege asyrý biz úshin óte mańyzdy. Osy úlgide oblystyq, aýdandyq, aýyldyq deńgeılerde de yntymaqtastyq ornatylýy kerek. Jergilikti jerdegi basshylar sizderdiń jumystaryńyzdyń mańyzyn jiti túsinip, qoldaý kórsetýleri kerek», dedi Ǵanı Beısembaev.
Kezdesýde aımaqtarda kóshpeli semınarlar ótkizý týraly usynys aıtyldy. Budan bólek, balalardyń quqyǵyn qorǵaý isinde ata-analardyń jaýapkershiligin arttyrý úshin «Ákeler keńesi» jáne «Analar keńesteriniń» jumysyn jandandyrý máselesi talqylandy.