Almaty oblysyna jumys saparymen barǵan Premer-mınıstr Álıhan Smaıylov turǵyn úı qurylysy, ınfraqurylym jáne ónerkásipti damytý barysymen tanysyp, «Jylý ortalyǵy» jylýmen jabdyqtaý kásipornynyń jumysyn tekserdi, dep habarlaıdy Egemen.kz Úkimettiń baspasóz qyzmetine silteme jasap.
Úkimet basshysyna jalpy uzyndyǵy 66 km Úlken Almaty aınalma avtomobıl jolyn (ÚAAAJ) salý jónindegi jobany iske asyrý týraly baıandaldy. Búgingi tańda negizgi jer jumystary júrgizilip, barlyq kópirler men jolaıyryqtar salyndy. Sonymen qatar avtojoldy abattandyrý jáne jolaqysyn alýdyń ıntellektýaldy júıesin iske qosý, kólik quraldaryn dınamıkalyq ólsheý jumystary jalǵasyp keledi.
Premer-mınıstr avtomagıstral óńirdiń ekonomıkalyq damýyna aıtarlyqtaı áser etip, ınvestısııalyq jáne týrıstik áleýetin arttyratynyn atap ótti. ÚAAAJ Qytaı men Eýropa arasyndaǵy tranzıttik tasymal kólemin ulǵaıtýǵa, Almatydaǵy kólik qozǵalysyn jeńildetýge múmkindik beredi, ıaǵnı qala ekologııasyna da oń áserin tıgizedi.
«Bul – memlekettik-jekemenshik áriptestik qaǵıdaty boıynsha elimizde júzege asyrylyp jatqan óte mańyzdy, alǵashqy ınvestısııalyq jobalardyń biri. Ol óńirdiń ekonomıkalyq damýyna tyń serpin berip, jol qozǵalysynyń qaýipsizdigin arttyrady. Ákimdik ÚAAAJ-ǵa deıingi radıaldy joldardy tez aıaqtaýy kerek. Úkimet óz tarapynan qajetti kómek kórsetedi», dedi Álıhan Smaıylov.
Sondaı-aq Premer-Mınıstr Gate City seriktes qalasyndaǵy «Qoıanqus» turǵyn aýdanynda jalpy alańy 290 myń sharshy metrden asatyn 70 kóppáterli turǵyn úıdiń qurylysymen tanysty. Jumystardy 2024 jyldyń sońyna qaraı aıaqtaý josparlanǵan.
G4 City-di damytý tujyrymdamasyna sáıkes ıntegrasııalanǵan qala tórt aýdannan turady: Gate – iskerlik jáne qarjy ortalyǵy, Golden – bilim berý jáne medısınalyq habtar, Growing – ónerkásiptik jáne logıstıkalyq habtar, Green – týrıstik klaster. Qazirgi ýaqytta Gate City aýmaǵynda magıstraldyq ınjenerlik jeliler júrgizilip, «Qoıanqus» turǵyn aýdanynyń qurylysy bastaldy.
«G4 City jańa Jibek jolynyń boıynda ornalasqan ekonomıkalyq jáne týrıstik ortalyqqa aınalady dep oılaımyz. Oblys ákimdigi jobanyń áleýmettik baǵytyna, eń aldymen qaladaǵy turmys sapasyna barynsha kóńil bólýi qajet», dedi ol.
Sonymen qatar Qonaev qalasynda Úkimet basshysy 2020 jyly gazǵa aýystyrylǵan «Jylý ortalyǵy» jylýmen jabdyqtaý uıymynyń jumysymen tanysty. Qazirgi ýaqytta ol shamamen 179,72 Gkal/saǵ óndiredi jáne 30 myńǵa jýyq abonentti, bıýdjettik uıymdardy jáne basqa da obektilerdi jylý energııasymen qamtamasyz etedi.
Álıhan Smaıylov jylýmen jabdyqtaý kózderin gazǵa aýystyrý onyń energııa tıimdiligin arttyrýǵa jáne atmosferaǵa shyǵarylatyn zııandy zattar qaldyqtaryn edáýir tómendetýge múmkindik bergenin atap ótti.
«Qonaev qalasyna oblys ortalyǵy mártebesin berý onyń damýyna aıtarlyqtaı serpin berip, qalaǵa kóship kelýshi halyqtyń sanyn kóbeıtti. Soǵan sáıkes óńirde jylý energııasyn tutynýǵa suranystyń ósýin eskere otyryp, ákimdik jylý kózderiniń qýatyn arttyrý máselelerin pysyqtaýy qajet», dedi ol.
Sonymen qatar Premer-Mınıstr «Knaýf Gıps Qapshaǵaı» JShS-ǵa bardy. Kásiporyn 2003 jyly jeke ınvestısııalar esebinen salyndy jáne gıpsten jasalǵan buıymdar, qurǵaq qurylys qospalaryn, sondaı-aq myryshtalǵan profılder shyǵarady.
Qazirgi ýaqytta óndiris 100% qýattylyqpen jumys isteýde. Zaýyt ónimderi ishki naryqqa jáne taıaý shetelderge: Aýǵanstan, Qyrǵyzstan, Reseı, Tájikstan, Túrikmenstan jáne О́zbekstan elderine jetkiziledi. 2022 jyly jalpy óndiris kóleminiń 30%-dan astamy eksportqa jiberildi.
Álıhan Smaıylov Úkimet qurylys ındýstrııasynda joǵary tehnologııalyq kásiporyndar qurýdy belsendi qoldaıtynyn, bul ımportty almastyrý kólemin ulǵaıtýǵa múmkindik beretinin atap ótti.
«Sheteldik ınvestısııalardy tarta otyryp, mundaı jobalardy iske asyrý ınvestorlardy qoldaý baǵytynda memlekettiń senimdi kórsetkishi bolyp tabylady. Oblys ákimdigi jańa ındýstrııalyq jobalardy iske qosý úshin qolaıly jaǵdaı jasaýdy odan ári jalǵastyrýy tıis», dep qorytyndylady Álıhan Smaıylov.