Kóne ǵuryp qolónerdi zamanǵa saı laıyqtap, kásip qylýǵa bolatynyn dáleldegen jastardy kórgende júregińiz jylıdy. Áýeli, dástúrdi jańǵyrtyp, jańartyp, HHI ǵasyrǵa alyp shyqqany úshin. Salt-dástúrdi sabaqtaǵany úshin. Ǵurypty umyt qaldyrmaǵany úshin. Osynyń bárine júrek eljireıtindeı-aq qoı. Qaraǵandy qalasynda turatyn Janerke Ahmetjanova osylaısha táńir bergen nesibesin terip keledi. Eńbegimen óngen jas kásipker «kóz – qorqaq, qol – batyr» deıdi.
Qazir kásip qylamyn, eńbek etemin degen adamǵa múmkindik bar. Memlekettik qoldaýdyń túrli baǵdarlamasy qarap otyrmaıtyn kisige kóp kómek. Tyń ıdeıalardyń tolaǵaı tabysqa bastaıtynyn buqara osy kúni jete túsindi. О́zin de, ózgeni de jumyspen qamtyp, táýir turmys keship jatqandar solaısha táýekelge bel býǵandar.
Janerkeniń «Erke» atelesiniń jumys bastaǵanyna nebári jyl jarym ýaqyt boldy. Sodan beri tapsyrys berýshileri de, ónimderiniń de qatary molaıǵan. Oblys ákimi grantyn jeńip alǵan Janerke quraq kórpe, oıý kórpe degennen bastap, qyz uzatý, tusaýkeser toıyna qatysty túrli tapsyrys qabyldaıdy eken.
– Atele ashylǵanyna bir jarym jyl bolyp qaldy. Osy ýaqytqa deıin tutynýshylar aıtarlyqtaı kóbeıdi. Grant arqyly isim órge júzdi. Bul grant – is bastaıtyn jastarǵa zor qoldaý. Ázirge ózim ǵana jumys istep otyrmyn. Aldaǵy ýaqytta kómekshi alý josparda bar. Búginde meniń qoldaýshym, ári tiregim Qudaı qosqan qosaǵym – Madııar Maqanov pen altyn enem. Osy shańyraqtyń tabaldyryǵyn kelin retinde attaǵaly kómekterin aıanyp qalǵan kezi joq. Tipti tapsyrystardy úlgermeı qalatyndaı jaǵdaı týsa, túnimen birge jumys istep, kómek qolyn sozady. Kelin bolyp túskende, óz isimdi bastaǵym keldi. Bastamama enem qoldaý kórsetti. Altyn enem is tigetin mashınka alyp berdi. Eń alǵashqy tapsyrys karantın kezinde tústi. Betperde tigýge tapsyrys berildi. Bir túnde 100-den asa maska tikken edik. Keıin grant utyp alǵan soń is mashınanyń qýattysyn alýǵa múmkindik týdy, – deıdi Janerke.
Osy kúni Janerkeniń tutynýshylarynyń qatary mol. Tipti táýlik boıy ótinish aıtqandardyń tapsyrysyn tapjylmaı otyryp, tigetin erik-jiger jetkilikti.
«Bıznes bastaǵanda tanystar, týystar klıent-tin. Keıin jarnamaǵa «24/7» belgisin qoıyp edim, tapsyrys berýshiler sany artty. Túnde de tapsyrys qabyldaımyn. Baıqasam, Qaraǵandy boıynsha túnimen tapsyrys qabyldaıtyn men ǵana ekenmin», deıdi Janerke.
Bul kúni jas kásipker mekemelerden de tapsyrys alyp otyr. Mekemelerdiń arnaıy kıimi, perdeler, akt zalyn bezendirý sekildi jumystarǵa suranys jıi túsedi. Sonymen qatar qazaqtyń toı-tomalaǵyna qatysty barlyq qajetti buıymdar jasaıtyn qabilet-qarymy jetkilikti. Oǵan da suranys ájeptáýir kórinedi. Áıteýir, eńbekten qashqan kezi joq.
«Elimizde eńbekqor adam, kásibı maman eń syıly adam bolýǵa tıis. Osyndaı azamattar memleketimizdi damytady. Men Ulttyq quryltaıda jáne «Jastar rýhynyń» sezinde buǵan arnaıy toqtaldym. Biz qarapaıym eńbek adamyna qurmet kórsetýimiz kerek. Qandaı kásippen aınalyssań da, ony sapaly atqarý mańyzdy», degen bolatyn Memleket basshysy Qasym-Jomart Toqaev.
Eńbektiń úlken-kishisi joq, ámanda. Qandaı eńbek bolsa da, qurmetke laıyq. О́ıtkeni ol eńbektiń árqaısysyna mańdaı ter sińgen. Mańdaı termen kelgenniń qadiri eren bolýǵa tıis endeshe. Jas sheber Janerkeniń eńbegi de dál sondaı.
Qaraǵandy oblysy