Shymkent qalasynda Respýblıkalyq Qazaqstan máslıhattary depýtattary birlestiginiń otyrysy ótti. Jıynda Qasym-Jomart Toqaevtyń saılaýaldy baǵdarlamasyn qoldaý jáne júzege asyrý jónindegi barlyq deńgeıdegi máslıhat depýtattarynyń birlesken úndeýin qoldaý jáne iske asyrý máselesi sóz boldy.
Is-sharaǵa «Qazaqstan máslıhattary depýtattarynyń birlestigi» RQB tóraǵasy T.Muqashev, Shymkent qalasynyń ákimi M.Áıtenov, qalalyq máslıhat tóraǵasy B.Narymbetov, «Shymkent qalalyq máslıhat depýtattary birlestigi» qoǵamdyq uıymy, Qoǵamdyq keńes músheleri, qalalyq jáne aýdandyq ardagerler keńesiniń tóraǵalary men máslıhat depýtattary qatysty.
Memleket basshysynyń saılaýaldy baǵdarlamasyn qoldaý jáne júzege asyrý jónindegi barlyq deńgeıdegi máslıhat depýtattarynyń birlesken úndeýi ótken jyldyń sońynda Aqtóbe qalasynda qabyldanǵan edi.
Otyrys barysynda qala ákimi M.Áıtenov jáne «Shymkent qalalyq máslıhat depýtattary birlestigi» qoǵamdyq uıymynyń tóraǵasy E.Satqanbaev baıandama jasady. «Qazaqstan máslıhattary depýtattarynyń birlestigi» RQB tóraǵasy T.Muqashev Memleket basshysynyń «Jańa Qazaqstan: jańarý men jańǵyrý joly» atty halyqqa Joldaýy men saılaýaldy baǵdarlamasyndaǵy máslıhatshylar men jergilikti ózin-ózi basqarýǵa qatysty basymdyqtaryna keńinen toqtaldy.
«Memleket basshysynyń máslıhattar aldyna qoıǵan «Jańa Qazaqstannyń qurylysy», jergilikti halyqtyń ómir súrý jaǵdaıy men sapasyn jaqsartý jónindegi jańa mindettemeleri depýtattardyń saılaýshylarmen aradaǵy jumysyn qaıta qurý men saılaýshylar tártibi jáne máslıhatshylardy keri shaqyryp alý ınstıtýttaryn engizýdi iske asyrady.
Jańa jaǵdaıda máslıhattar depýtattarynyń negizgi qyzmeti – óz aýmaǵynda sapaly áleýmettik ınfraqurylymdy: balabaqsha, abattandyrý, saýda nysandary, joldar, kitaphana, mektep, turǵyn úı jáne áleýmettik nysandardy salý men jóndeýdi uıymdastyrýdan kórinbek. Mysaly, aldaǵy ýaqytta elimizde kóptegen áleýmettik ınfraqurylym nysandary saılaýshylardyń talaby men jergilikti memlekettik baǵdarlamalar negizinde qurylady. Degenmen bul ózgeristerdiń barlyǵy máslıhatshylardyń belsendi azamattardy tarta otyryp turaqty monıtorıng pen baqylaý jasaý jaýapkershiligin arttyrady», dedi birlestik tóraǵasy.
T.Muqashevtiń aıtýynsha, jańa Qazaqstan qurý mindetterin oıdaǵydaı júzege asyrý úshin aldyńǵy qatarly elderdiń tájirıbesine súıenip, memlekettik basqarý jáne jergilikti ózin-ózi basqarý júıelerin bilim negizine kóshirý qajet. Otyrys sońynda jıynǵa qatysýshylar talqylanǵan máseleler boıynsha ózara pikir almasty.
Shymkent