Choco holdınginiń basshysy, kásipker Ramıl Mýhorıapovqa qatysty is toqtatyldy. Bul týraly Almaty qalasynyń prokýratýrasy málimdedi, dep habarlaıdy Egemen.kz
Buǵan deıin Almaty qalalyq Polısııa departamenti Ramıl Mýhorıapovtyń sózine súıenip, áleýmettik, ulttyq, rýlyq, násildik, taptyq jáne dinı arazdyqty qozdyrý faktisin tekserý úshin sotqa deıingi tergeýdi bastaǵan edi.
«Sotqa deıingi tergep-tekserý nátıjeleri boıynsha qylmystyq qýdalaý organy Qylmystyq is júrgizý kodeksiniń 35-babynyń 1-bóligi 2-tarmaǵyna sáıkes qylmystyq quqyqbuzýshylyq quramynyń bolmaýyna baılanysty isti toqtatý týraly prosessýaldyq sheshim qabyldady. Almaty qalasynyń prokýratýrasy prosessýaldyq sheshimmen kelisti», dedi Almaty qalasy prokýrorynyń orynbasary Nurlan Aýǵanbaev.
Eske sala ketsek, ótken jyldyń qazan aıynda kásipker, Choco holdınginiń basshysy Ramıl Mýhorıapov Reseıden kóship kelgendermen kezdesýinde qazaq tiline qatysty sóz aıtyp, basy daýǵa qalǵan edi. Jeli qoldanýshylary Mýhorıapovtyń bul qylyǵyn teris qabyldap, aıyptaǵan. Keıinirek Ramıl Mýhorıapov Qazaqstan halqynan keshirim surap, arnaıy vıdeony jelige júktegen.
Gúlshahra SANSYZBAI