Memleket basshysy Qasym-Jomart Toqaev elordany damytý máseleleri jónindegi keńes otyrysynda qaladaǵy medısına salasynyń olqylyqtaryn atady, dep habarlaıdy Egemen.kz.
«Qalada medısınalyq qyzmettiń sapasyna jáne onyń qoljetimdi bolýyna qatysty shaǵym kóp. Bul jerde demografııany da eskergen jón. Elorda turǵyndarynyń sany sońǵy on jylda 2,5 ese ósti. Medısına ınfraqurylymy bul qarqynǵa ilese almaı jatyr. Emhanalarda kezek kóp. Perzenthanalarda oryn tapshy. Ondaǵy júkteme qalypty normadan 68 paıyzǵa artyq. Sondaı-aq keıbir aýrýhanada sanıtarlyq talaptar saqtalmaıdy», dedi Prezıdent.
Onyń aıtýynsha, balalar emhanasyndaǵy qabyldaý bólmeleri zaman talabyna saı emes. Qalada balalarǵa arnalǵan jalǵyz travmatologııa pýnkti bar. Jaraqat alǵan balalar sol jerde uzyn-sonar kezekte turýǵa májbúr bolady.
«Úshinshi kópsalaly balalar aýrýhanasy tek ınfeksııalyq aýrýlardan emdeıdi. Onda hırýrgııa, oftalmologııa jáne travmatologııa bólimderi jumys istemeıdi. Elorda úshin bul – uıat nárse. Densaýlyq saqtaý mınıstrligine qala ákimdigimen birlesip, balalar medısınasyna qatysty máseleniń bárin sheshýdi tapsyramyn. Paıda tabýdy kózdegen jekelegen aýrýhanalar múmkindigi bola tura keıbir dárigerlik qyzmet kórsetýden bas tartyp jatyr», dedi Q. Toqaev.