Almatyda Eýrazııalyq ekonomıkalyq komıssııa (EEK) alqasy janyndaǵy Memlekettik satyp alýlar jónindegi konsýltatıvtik komıtettiń kóshpeli otyrysy ótti. Kún tártibinde talqyǵa túsken máseleler – odaqqa múshe «bestik elderdiń» óndirýshileri men jetkizýshileriniń memlekettik satyp alýlarǵa teń qoljetimdiligi, memlekettik satyp alý boıynsha banktik kepildikterdi ózara taný, satyp alý prosesin tolyq sıfrlandyrý maqsatynda EEK zańnamasyn ázirleý, satyp alýdaǵy ulttyq rejimniń jumys isteý prınsıpterin jetildirý.
Osyǵan deıin Eýrazııalyq ekonomıkalyq komıssııanyń keńesi taýarlar EAEO-da óndirilgen bolyp esepteletin jáne Odaq memleketterinde taǵy 55 taýar pozısııasy boıynsha memlekettik satyp alýǵa jiberiletin óndiris sharttaryn bekitkeni týraly jazǵanbyz. «Memlekettik satyp alýdy júzege asyrý úshin jekelegen taýar túrleriniń shyǵarylǵan eldi aıqyndaý qaǵıdalaryna» №1 qosymshaǵa tıisti ózgerister engizildi. Bul ónimderge aerodrom traktorlary, 3D prınterler, mıkrofondar, daýys zoraıtqyshtar, telefondar, dybystyq júıeler, qurylǵylar men kompıýterlik qýat kózderine arnalǵan tizbekter, skanerler, bıometrııalyq júıeler, jaryq dıodtary, talshyqty-optıkalyq kabelder, tynys alý apparattary jáne basqa da ónimder kiredi. Jalpy, engizilgen ózgerister bes salany qamtydy: stanok jasaý, arnaıy mashına jasaý, medısınalyq maqsattaǵy buıymdar, mýzykalyq aspaptar óndirisi, sondaı-aq aýdıotehnıka, elektronıka jáne radıoelektronıka. Barlyq shart pen óndiristik operasııa EAEO elderiniń ýákiletti organdarymen jáne bıznesimen kelisilgen.
EEK Keńesi tusqaǵaz óndirisiniń ılemdelgen polıvınılhlorıdine arnalǵan kedendik ákelý bajynyń stavkasyn qosa alǵanda 2024 jylǵy 29 aqpanǵa deıin ýaqytsha nólge túsirý týraly sheshim qabyldady.
EAEO karantındik obektileriniń biryńǵaı tizbesi zııandy organızmniń jańa túrimen tolyqtyryldy, tuqymdyq jáne otyrǵyzatyn materıal atalǵan karantındik obektiden bos bolýǵa tıis ekeni týraly talap belgilendi.
EEK Keńesi osyǵan deıin Sáıkestikti baǵalaýdyń tıptik shemalaryna ózgeristerdi bekitken edi. Bul sheshim osy salada uıymdastyrýshylyq-ókim etýshilik sıpatynda jaqsartý úshin jaǵdaılar jasaıdy. Olar Odaqtyń sáıkestikti baǵalaý týraly qujattaryna (sertıfıkattary men deklarasııalaryna) zańdy tulǵanyń ataýy nemese dara kásipkerdiń tegi men aty-jóni ózgergen kezde, sondaı-aq óndiristiń naqtyly orny ózgermegen jaǵdaıda ónim óndiriletin jerdiń mekenjaıynyń jekelegen derektemeleri ózgergen kezde (sóz qala, kóshe ataýynyń ózgerýi, poshta ındeksiniń, úı nómiriniń ózgerýi týraly bolyp otyr) utymdy túzetýler engizýge múmkindik beredi. Bul EAEO elderiniń is basyndaǵy sharýashylyq júrgizýshi sýbektileriniń jumysyn jeńildetedi.
EEK Básekelestik jáne monopolııaǵa qarsy retteý mınıstri Baqyt Sultanovtyń aıtýynsha, EEK Keńesiniń sheshimi Odaq elderi óndirýshileriniń bir-biriniń memlekettik satyp alýlaryna qatysý múmkindikterin aıtarlyqtaı keńeıtedi.
«Qabyldanǵan sharttar men tehnologııalyq operasııalar odaq memleketterinde qurylǵan qýattardy óndiris prosesinde barynsha paıdalanýǵa múmkindik beredi. Bul ımportty almastyrý jáne óndiristi kóshirý jaǵdaıynda mańyzdy», dep túsindirdi mınıstr.
B.Sultanov aıtyp ótkendeı, jıynnyń ózekti máseleleri men basymdyqtary – memlekettik satyp alý salasyndaǵy sıfrlandyrý, odaq zańnamasyn jetildirý máselelerin sheshý, atap aıtqanda, banktik kepildikter men elektrondy sıfrlyq qoltańbany ózara taný.
«Biz kúni búginge deıin birqatar másele boıynsha ymyraǵa keletin sheshimderdi talqyladyq. Bul kelisimge kele almaı jatqan máselelerdiń alǵa jyljýyna múmkindik beredi», dedi B.Sultanov.
Belarýs monopolııaǵa qarsy retteý jáne saýda mınıstriniń orynbasary Andreı Kartýn banktik kepildikterdi ózara taný týraly kelisimge qol qoıý márege jaqyndap qalǵanyn, birqatar másele taǵy da talqylaýdy qajet etetinin aıtty. Onyń sózinshe, bul másele Belarýs bankteri men sýbektileri úshin ishinara sheshilgen. Búginde jeti belarýs banki Reseı naryǵyna banktik kepildikter beredi.
Armenııa birjaqty tártipte EAEO elderiniń banktik kepildikterin qabyldaýdy bastap ketipti. Armenııa Qarjy mınıstriniń orynbasary Avag Avanesıan odaqqa múshe elderdiń ortalyq bankteriniń lısenzııalary Armenııa úshin jaramdy dedi. «Bizge odaqqa múshe elderdiń ortaq sheshimge kelgeni tıimdi. Sol kezde ǵana EEK keńistiginde memlekettik satyp alý júıesin qalyptastyra alamyz», dep atap ótti ol.
ALMATY