Aýyl sharýashylyǵy – el ekonomıkasynyń draıveri

Saıası uıym tarıhyndaǵy asa mańyzdy kezdesýdi «Aýyl» partııasynyń tóraǵasy Álı Bektaev ashty. Ol óz baıandamasynda aýyl árbir azamattyń altyn besigi ekenin atap ótti.

– Biz aýyldyń múddesin qorǵaımyz. «Aýyl» partııa­sy Parlament saılaýyna Qazaq­stannyń azyq-túlik qaýip­sizdigin qamtamasyz etýge negizdelgen baǵdarlamasymen qatysatynyn málimdeıdi. «Aýyl» partııasynyń qatarynda elimizdiń kóptegen patrıot, isker azamaty bar. Sezde Parlament Máji­lisiniń depýtattyǵyna kandı­dattardyń partııalyq tizimin bekittik jáne bir mandatty saılaý okrýgteri boıynsha kandıdatýralardy usyndyq.

Bizdiń partııa osymen úshinshi ret Parlament jáne máslıhat saılaýyna qatysyp otyr. 2017 jyly birinshi saılaýda bizdiń kórsetkish kóńilimizden shyqqan joq. Sodan beri «Aýyl» partııa­sy óziniń jumysyn jandandyryp, oı túzep, óziniń josparyna tolyq ózgerister engizip, keshendi baǵdarlamasyn qalyptastyr­dy. Qazirgi ýaqytta saıası uıym­ǵa aınaldy dep tolyq senim­men aıta alamyn. 2012 jylǵy saılaýda biz Parlament Májili­sine óte almadyq. Sol kezdegi máslıhat saılaýynda jergilikti máslıhattardyń depýtattyǵyna 237 azamat ótti. Budan bólek, aýyl ákimderiniń saılaýynda 35 aýyl partııasynyń múshesi ákim bolyp saılandy. Bıylǵy saılaýdan úlken úmit kútemiz. Bul naýqanda partııanyń 600-den astam ókilin túrli deńgeıdegi máslıhat depýtattyǵyna kandıdat retinde usynamyz, dedi partııa tóraǵasy.

Partııanyń baǵyty esh ýa­qytta ózgermeıdi. Aýyl sharýa­shylyǵy men agrarlyq salany damytý jáne aýyldyq eldi mekenderdi damytý asa mańyzdy ekenin aıtqym keledi. Aýyl – bizdiń bolashaǵymyz. Aýyl – el ekonomıkasynyń negizgi draı­veri. Aýyldyń jaǵdaıyn tú­z­ep, aýyldaǵy azamattardy turaq­tandyratyn bolsaq, qalanyń da jaǵdaıy jaqsarady, – dedi Álı Bektaev.

Quryltaıda partııanyń saılaýaldy baǵdarlamasyndaǵy negizgi máseleler talqyǵa tústi. Máselen, turǵyndarmen kezdesý barysynda satyp alýshylar tarapynan baǵalarǵa qatysty kóptegen suraq týyndap jatady. Negizinen baǵanyń turaqsyzdyǵy, onyń únemi kóteriletini, taýardyń qymbattyǵy týraly aıtylady. Al satýshylar «otandyq ta­ýar óndirýshilerden taýarlardy júıeli túrde jetkizý joq, sondyqtan ımporttyq daıyn ónimdermen jumys isteýge týra keledi» degen pikirdi alǵa tartady. Partııa tóraǵasynyń orynbasary Jıgýlı Daırabaevtyń aıtýynsha, azyq-túlik taýarlary baǵasynyń turaqty ósýi eldiń azyq-túlik qaýipsizdigine tikeleı jáne naqty tóngen qaýip. «Azyq-túlik qaýipsizdigi elementteriniń biri – azamattardyń qoljetimdi, qolaıly baǵamen azyq-túlik satyp alý múmkindigi. Bul bizdiń elde joq. Munyń bári rettelýi úshin eń bastysy, kúshti qoldaý qajet. Qaptamaǵa yńǵaıly, sapaly, suryptalǵan ónim kóp bolýy kerek. Ol úshin kooperatıvter, satý kooperatıvteri qurylýǵa tıis. Memlekettiń agrarlyq saıasatyn úılestirý qajet. Ol úshin aýyl sharýashylyǵy ınfraqurylymyn qurý mańyzdy. Aýyl eńbekkerleriniń aýylda óndiretin ónimderin dál osy uıymdar satyp alyp, qalaǵa jetkizedi. Munyń bári aýyl sharýashylyǵy taýaryn óndirýshilerdiń kooperasııasy negizinde bolýǵa tıis. Baǵalar qolaıly bolýy úshin aýylsharýashylyq ónimderin kóbirek óndirip, sapaly ónim shyǵarý kerek», deıdi ol.

«Aýyl» partııasy aýyldyq eldi mekenderdi jańǵyrtý jónindegi uzaq merzimdi ulttyq strategııany zań deńgeıinde qa­byl­daýdy  usynyp otyr. Ási­rese aýyl sharýashylyǵy eńbek­kerleriniń mártebesin arttyrý óte mańyzdy. Qala turǵyndaryn kommersııalyq ústeme baǵasyz azyq-túlik taýarlarymen qam­tamasyz etý úshin megapolıster­de, monoqalalarda, oblys jáne aýdan ortalyqtarynda tutyný qoǵam­dary men kooperatıvter jelisin qurý jáne damytý josparlanǵan.