Jýyrda «Qazaqstan zańgerler odaǵy» qoǵamdyq birlestiginiń keńsesinde Májilis pen máslıhattar depýtattarynyń kezekten tys saılaýy boıynsha «Adal saılaý úshin» shtab músheleriniń otyrysy ótti.
Jıynda «Adal saılaý úshin» shtabynyń jumysy resmı túrde bastalǵany habarlandy. «Qazaqstan zańgerler odaǵynyń» músheleri elimizdiń barlyq aımaǵynda halyqqa saılaý zańnamasynyń negizgi erejelerin túsindiretin bolady. «Ár azamat tańdaý jasamas buryn óz quqyǵyn jetik bilip, kandıdattarǵa artylǵan júkti jete túsinýge tıis», deıdi zańgerler. Sondaı-aq «Adal saılaý úshin» shtabynyń jumysy barysynda saılaý úderisine qatysýshylarǵa quqyqtyq kómek kórsetiledi jáne azamattyq qoǵam men halyqaralyq uıym ókilderimen birlese júıeli jumystardy atqarý josparlanǵan.
Shtab basshysy Serik Aqylbaı 2004 jyldan beri alǵash ret Májiliske kandıdattar bir mandatty okrýgter boıynsha saılanatynyn (98 depýtattyń 29-y), endi oblystyq aýmaqtyq saılaý komıssııalary kásibı negizde jumys isteıtinin atap ótti. Sondaı-aq ortalyqtyń jumysyna toqtaldy. «Ortalyqta 7 adam bar, olar – shtabtyń músheleri. Ár óńirde pýl qurǵanbyz. О́ńirlerde 150 adam bar. Olar halyqpen kezdesedi, olardyń suraqtaryna jaýap beredi. Biz eshqandaı úgit-nasıhat jumysyn júrgizbeımiz. Tek qana zańdy túsindirý, zańdyq kómek berý sııaqty jumystardy atqaramyz», deıdi S.Aqylbaı.
Shtab múshesi Ábdikárim Aqjanov áıelder, jastar jáne erekshe qajettilikteri bar adamdar úshin 30 paıyzdyq kvota belgileý týraly, sondaı-aq Májilistiń jańa quramynda Qazaqstan halqy assambleıasynyń kvotasy bolmaıtynyn aıtty. Sol týrasynda tushymdy pikirlerin ortaǵa saldy.
Shtab múshesi Dýman Jampeıisov Májilis pen máslıhattar saılaýda alǵash ret bıýlletenderde «barlyǵyna qarsy» degen baǵan bar ekenin, endigi jerde saılaýshylar bes bıýlleten boıynsha daýys beretinin (respýblıkalyq mańyzy bar qalalarda tórt bıýlleten) jetkizdi.
Shtab múshesi Ánýarbek Sqaqov 7 saıası partııanyń saılaý naýqanyna qatysýǵa quqyly ekenin aıtyp, olardyń ekeýi Partııalar týraly zańnyń jańa normalary kúshine engennen keıin tirkelgenin, sondaı-aq partııalar men úkimettik emes uıymdardan ǵana emes, ózin-ózi usyný arqyly da usyný múmkindigin aıtty. Sonymen qatar partııalardyń ótý shegi 7-den 5%-ǵa deıin tómendetilgenin atap ótti.