Memleket basshysy 2022-2026 jyldarǵa arnalǵan sybaılas jemqorlyqqa qarsy saıasat tujyrymdamasyn bekitkeni belgili. Ony júzege asyrý jónindegi is-qımyl josparynda bıyl quqyq qorǵaý jáne sot organdarynda parasattylyqqa tekserýdi nemese integrity check engizý tetigin pysyqtaý kózdelgen.
Jýyrda Ishki ister mınıstrliginiń alqa otyrysynda vedomstvo basshysy Marat Ahmetjanov ishki ister organdarynyń qyzmetkerlerin parasattylyqqa tekserýdiń qanatqaqty jobasynyń iske qosylǵanyn habarlady. Vedomstvoda polıseılerdiń kúndelikti jumysyna barynsha jaqyn sıtýasııalyq keıster, olarǵa den qoıý nusqalary jáne tekseriletin adamdardyń is-áreketterin baǵalaý krıterııleri ázirlengen.
Eń aldymen kúndelikti halyqpen baılanysta bolatyn bólinisterdiń qyzmetkerleri tekserýden ótti. Bul – patrýldik polısııa, ıývenaldy polısııa, kóshi-qon qyzmeti, ýchaskelik polısııa pýnktteriniń, modýldik jáne stasıonarlyq beketterdiń, front-ofıster men kezekshi bólimderdiń qyzmetkerleri. Bastapqy kezeńde azamattarmen qarym-qatynas qurý, qyzmetkerlerdiń olardyń ótinishterine jedel áreket etý qabiletin tekserýge basa nazar aýdaryldy. Sondaı-aq qyzmetkerdiń syrtqy túri, ıaǵnı nysandyq kıimi, materıaldyq-tehnıkalyq jaraqtandyrylýy, qyzmettik planshetterdi, beınetirkegishterdi, jetondardy, avtokólikterdi maqsatty paıdalanýy baǵalandy. Qańtar aıynda Astana, Almaty qalalarynyń, Almaty, Qaraǵandy, Pavlodar jáne Jetisý oblystarynyń polısııa departamentterinde tekserýler júrgizildi. Joba iske qosylǵan qysqa merzimge qaramastan tekserý nátıjeleri tıimdiligin kórsetip otyr. Atap aıtsaq, ótinishterge jedel qyzmet kórsetile bastady, qyzmetkerlerdiń óz jumysyna jaýapkershilikpen qaraýǵa, durys jáne sypaıy jaýap berýge umtylysy baıqalady. Bul qyzmet kórsetý modeliniń prınsıpterine sáıkes keledi. Sonymen qatar tekserý profılaktıkalyq turǵydan da áser etip otyr. О́tken aıda anyqtalǵan ákimshilik quqyq buzýshylyqtardyń sany edáýir ósken. Mysaly, tek Astana qalasynda jol qozǵalysy erejelerin buzýdyń jalpy sany 23 800-ge deıin jetti. Qanatqaqty jobanyń bastalýymen polısııa qyzmetkerleriniń olarǵa para berý áreketteri týraly habarlaýy da artqan. Bıyl qańtar aıynda ótken jyldyń sáıkes kezeńimen salystyrǵanda mundaı faktilerdiń sany 3 esege jýyq ósti. Qazirgi ýaqytta polısııa qyzmetkerleri, sondaı-aq olardyń qyzmettik avtokólikteri men úı-jaılary aqparatty avtomatty túrde jedel basqarý ortalyqtaryna jiberetin zamanaýı fıksatorlarmen jabdyqtalǵan.
«Laýazymdy adamǵa para bergeni úshin aıyppul salýdy nemese bes jylǵa deıingi merzimge bas bostandyǵynan aıyrýdy, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrýdy kózdeıtin qylmystyq jaýapkershilik qarastyrylatynyn eske salamyz. Polısııa qyzmetkerlerine qyzmettik mindetterin atqarý kezinde baǵynbaý men qarsylyq kórsetýge jol berilmeıtini týraly habarlaımyz. Jyl basynan beri osyndaı 19 fakt, sondaı-aq bılik ókilin qorlaýdyń 44 faktisi tirkeldi. Azamattardy zańǵa baǵynýǵa jáne zańsyz áreketterdi jasamaýǵa shaqyramyz. Bopsalaý jaǵdaıynda IIM-niń ózindik qaýipsizdik qyzmetine nemese 1402 senim telefonyna dereý habarlaý qajet», delingen vedomstvonyń resmı habarlamasynda.