Bıylǵy oqý jylynan kolledjderge kásiporyn ótinimderi boıynsha maman daıarlaý engizildi. Osyndaı ózara yntymaqtastyq eńbek naryǵynyń suranysyna saı bilikti maman ázirleýge múmkindik beredi.
Memlekettik tapsyrystyń artyqshylyǵy – kolledj bitirgen soń stýdent tapsyrys berýshiniń kompanııasynda jumys isteıdi. Ol úshin bilim berý uıymy, kásiporyn jáne stýdent arasynda úsh jaqty kelisimshart jasalady. Oqý-aǵartý mınıstrligi Tehnıkalyq jáne kásiptik bilim departamentiniń dırektory Ernat Júnisovtiń aıtýynsha, atalǵan vedomstvo bıylǵy oqý jylynan Memleket basshysynyń tapsyrmasyna sáıkes jumys berýshiniń ótinimderi negizinde oqytýdy bastaǵan.
– Kolledjder eńbek naryǵyna qajet kadr daıyndaıdy. Kásiporyndarǵa óz bazasynda tájirıbeden ótkizý, taǵylymdama uıymdastyryp, túlekterdi jumysqa qabyldaý júkteledi, – deıdi ol.
Aıta keteıik, maqsatty tapsyrys kolledjderge kadrlyq suranysqa saı bilim berý baǵdarlamasyn jańartýǵa múmkindik týǵyzady. Qazirgi tańda maman daıarlaýdy «Saryarqa avtoprom», «Kamaz» JShS, «Arselor Mıttal Temirtaý» AQ, «Kentaý transformator zaýyty» AQ, «Bazıs-Astana», «Aster Auto Astana» JShS jáne basqa da iri kásiporyndar qoldap otyr.
Qysqasy, 10 myńnan asa kolledj stýdenti kásiporyndardyń tapsyrysy boıynsha bilim alady.