Qaraǵandy aımaǵynda balalardyń bos ýaqytyn tıimdi ótkizýi úshin tegin úıirmeler kóbeıip keledi. Resmı málimetterge súıensek, qazir oblysta aqysyz 144 úıirme jumys istep tur. Onda 4 806 bala túrli baǵytta ózin-ózi damyta alady.
Balalar munda bı túrlerin úırenip, beıneleý, keskindemede talabyn ushtaıdy. Kıim úlgilerin daıyndap, ony piship, tigýdi úırenedi. Akterlik sheberlik, estradalyq vokal, halyq ánderi, dombyra úıirmesi de bar. Úıirmeler munymen shektelmeıdi. Bul arada tek bir parasy ǵana atalyp otyr. Shyǵarmashylyq tapsyrystaǵy úıirmeler Qaraǵandy, Temirtaý, Shahtınsk jáne Saran qalalarynda da jaqsy jumys istep tur.
Bul oraıda erekshe balalalar da umyt qalǵan joq. Máselen, «Batyl júrek» jáne «Ýmnısy» qoǵamdyq qaıyrymdylyq qorlarynyń beıimdelgen eki úıirmesinde sýret, kórkemsýret jáne músindeýge qyzyqqan múmkindigi shekteýli 25 bala bar. Jalpy, bıyl óńirdegi shyǵarmashylyq tapsyrysty jan basyna qarjylandyrýǵa bıýdjetten 1 mlrd 127 mln teńge bólingen.
– Meniń qyzym Emılııa eki jyl boıy La Dance complex stýdııasynyń Millennium ansamblinde bıleıdi. Alǵashqy jyly aqyly oqydyq. Sodan keıin ArtSport baǵdarlamasy týraly bilip, vaýcher aldyq. Endi bir jyldan beri tegin aınalysyp kelemiz. Áıtpese aıyna 13 myń tóleýge týra keler edi. Menińshe, bul balalar úshin tamasha múmkindik. О́ıtkeni barlyq otbasynyń aqyly úıirmelerge balalaryn jiberýge múmkindigi joq, – deıdi Qaraǵandy turǵyny Naılıa Imranova.
Qazirgi tańda ansamblge 3 jastan 13 jasqa deıingi 200-ge jýyq bala qatysady.
– La Dance complex ortalyǵy aldymen Astanada ashyldy. ArtSport jobasynyń nátıjesinde keńeıip, 2021 jyly Qaraǵandyda jumys isteı bastadyq. Buǵan deıin ár fılıalda 60-tan 150-ge deıin bala oqyǵan, jan basyna shaqqandaǵy qarjylandyrýdan soń tek Qaraǵandynyń ózinde balalar sany 385-ke deıin ósti, – deıdi Qaraǵandydaǵy stýdııanyń negizin qalaýshy Anna Volodına.
Stýdııada bı, keskindeme, shahmat, vokal úıirmeleri uıymdastyrylǵan.
Kıim pishý jáne tigýdi úırengisi keletin baldyrǵandarǵa «Toǵjan» shyǵarmashylyq ortalyǵynda arnaıy sertıfıkaty bar sheberler sabaq beredi. «Kıim úlgisi, pishý jáne tigý» úıirmesindegi tórt topqa 30-dan astam bala qatysyp júr.
– Bastapqyda «Keskindeme jáne sýret salý» baǵytyndaǵy 6 topta shamamen 60 bala oqydy. Bir ǵana oqytýshy boldy. ArtSport baǵdarlamasy arqyly bizdiń ortalyqta taǵy úsh úıirme ashyldy: dombyra, kıim úlgileý, pishý jáne tigý, grafıka. Toǵyz oqytýshy jumysqa qabyldandy. Bul úıirmelerge 280 adam tegin barady. Pishý jáne tigýmen aınalysatyn balalar túrli kórsetilimderge qatysady, – deıdi ortalyq basshysy Aıgúl Medeýbaeva.
Qazaqstanda memlekettik shyǵarmashylyq tapsyrys jobasy 2021 jyldyń mamyr aıynda bastalǵan bolatyn. Onyń maqsaty – 4 pen 17 jas aralyǵyndaǵy balalardy tegin sabaqtarmen barynsha qamtý. Joba artsport.edu.kz portalynda iske asyrylady. Ol qyzmet kórsetýshilerdi, sondaı-aq balalar men jasóspirimderdiń ata-analaryn nemese zańdy ókilderin shyǵarmashylyq úıirmeler men sport túrlerine tegin qatysýǵa vaýcher alý úshin tirkeýge jáne ótinimder qabyldaýǵa arnalǵan.
Qaraǵandy oblysy