Bul týraly «Atameken» Ulttyq kásipkerler palatasynda ótkizilgen jıynda QR IIDM Indýstrııalyq damý komıtetiniń Jeńil ónerkásip basqarmasynyń basshysy Aıjan Ádilova aıtyp berdi, dep habarlaıdy Egemen.kz.
Atalǵan salany damytý máselelerine arnalǵan is-sharaǵa memlekettik organdardyń, salalyq qaýymdastyqtardyń jáne otandyq kásiporyndardyń ókilderi qatysty.
Jıyn barysynda vedomstvo ókili byltyrǵy kórsetkishterge toqtalyp, aldaǵy kezeńge arnalǵan josparlar týraly habardar etti.
«2022 jyldyń qorytyndysy boıynsha Qazaqstanda jeńil ónerkásiptegi óndiris kólemi 6%-ǵa artyp, 178 mlrd teńgege jetti. Aıtalyq, toqyma buıymdarynyń óndirisi 5,3%-ǵa, kıim óndirisi 7,8%-ǵa, sondaı-aq bylǵary jáne onymen baılanysty ónimderdiń kólemi 3,7%-ǵa ósken», dedi A.Ádilova.
Sonymen qatar basqosýda maqta, jún, teri jáne bylǵaryny óńdeý máselelerine erekshe nazar aýdaryldy. Budan bólek otandyq brendterdi yntalandyrý boıynsha usynystar qarastyryldy.
«Anyqtalǵan tabysty baǵyttar memlekettik shyǵyndy azaıtyp, biraq sala óndirisine aıtarlyqtaı áser etetin kıim óndirisiniń segmentterin damytýdyń múmkindigin kórsetip otyr. Osyǵan oraı shetelde otandyq mamandardy oqytýǵa sýbsıdııa berý jáne elimizdiń brendteriniń memlekettik deńgeıde aqparattyq súıemeldeýin qamtamasyz etý máselesin pysyqtaý qajet», dedi Jeńil ónerkásip basqarmasynyń basshysy.
Qazir Qazaqstanda jeńil ónerkásip salasy baǵytynda jumys isteıtin 1 420 kásiporyn tirkelip, shamamen 30 myń adam eńbek etetinin aıta keteıik.