Bokstan Qazaqstannyń erler quramasy Bolgarııanyń bas shahary – Sofııada jalaýy jelbireıtin dástúrli «Strandja» kýbogine qatysady.
20-27 aqpan aralyǵyna josparlanǵan jyldyń eń iri jarystarynyń birinde el namysyn 13 boksshy qorǵaıdy. Olardyń arasynda álem jáne Azııa chempıony, Olımpııa oıyndarynyń júldegeri bar. Atap aıtar bolsaq, araǵa bir jarym jyl salyp ulttyq quramaǵa qaıta oralǵan 2019 jylǵy álem chempıony Bekzat Nurdáýletov, Tokıo Olımpıadasynyń qola júldegeri Qamshybek Qońqabaev, Azııa chempıony Aslanbek Shymbergenov jáne bolashaǵynan kóp úmit kúttiretin jas boksshylar Bolgarııada judyryqtasady.
Sofııa sharshy alańyna shyǵatyndar: Ernur Qaırat (48 kg), Kenje Muratuly (51 kg), Bekzat Aldamjarov (54 kg), Orazbek Asylqulov (57 kg), Erasyl Tańqaı (60 kg), Ertýǵan Zeınýllınov (63,5 kg), Temirhan Tezek (67 kg), Aslanbek Shymbergenov (71 kg), Nurqanat Raıys (75 kg), Bekzat Nurdáýletov (80 kg), Bekzat Tańatarov (86 kg), Abzal Quttybekov (92 kg) jáne Qamshybek Qońqabaev (+92 kg).