Qazaqstan quramasynyń parasportshylary byltyrǵy Barys jylynda zor tabysqa qol jetkizdi. 2022 jyly jalaýy jelbiregen birqatar halyqaralyq básekede táýir nátıje kórsetip, jankúıerlerdi shattyqqa bólegen kezi az bolǵan joq. Máselen, otandastarymyz bir jyl bederindegi san túrli dodada 62 altyn, 63 kúmis jáne 62 qola medal, jalpy – 187 júlde oljalady. Bul – parasportshylar úshin jaqsy kórsetkish.
Mádenıet jáne sport mınıstrligi usynǵan málimet boıynsha, Qazaqstan parasportshylary arasynda el qorjynyna eń kóp medaldi para paýerlıftıng (51 medal, onyń 22-si altyn), júzý (42 medal, onyń 15-si altyn) jáne para jeńil atletıka (41 medal, onyń 13-i altyn) ókilderi salǵan eken. Keıingi oryndarǵa para dzıýdoshylar (20 medal, onyń 6-ýy altyn) men para taekvondoshylar (16 medal, onyń ekeýi altyn) jaıǵasqan.
Sonymen qatar otandyq parasportshylar para voleıbol (1 altyn), para shańǵy jarysy jáne para bıatlon (8 medal, onyń bireýi altyn), para ústel tennısi (5 medal, barlyǵy – qola), para sadaq atý (2 medal, bireýi altyn) jáne para karate (1 altyn júlde) túrlerinen de halyqaralyq jarystarda túrli-tústi júldelerge qol jetkizgen.
Qazaqstan parasportshylary úshin 2022 jyldaǵy eń tabysty kezeń – qarasha (61 medal), maýsym (35) jáne qazan (32) aılary boldy. О́ıtkeni dál osy ýaqyt aralyǵynda jerlesterimiz jyldyń eń iri týrnırlerinde óner kórsetip, úzdikter qatarynan kórinýge múmkindik aldy. Aıtalyq, maýsym aıynda paýerlıftıngten Azııa men Muhıt aımaǵy ashyq chempıonaty ótip, onda bizdiń parasportshylar 4 altyn, 8 kúmis jáne 6 qola júldege ıe boldy. Qazan aıynda jerlesterimiz birqatar sport túrinen uıymdastyrylǵan álem chempıonattaryna qatysty. Bul dodalarda Qazaqstan qorjynyna 10 medal tústi.
Al qarashada Qazaqstan parasportshylary ár eki jyl saıyn halyqaralyq arbada otyrǵandar men ampýtanttar sport federasııasy ótkizetin IWAS Dúnıejúzilik oıyndarynda baq synady. Bul synda el quramasynyń ókilderi jalpy sany – 42 medal (11 altyn, 17 kúmis jáne 14 qola) oljalap, jalpykomandalyq esepte úzdikter qatarynan kórindi.
«Qazaqstanda keıingi birneshe jylda parasport túrleri qarqyndy damyp keledi. Sonyń nátıjesinde sportshylarymyz iri halyqaralyq jarystarda jıi jeńis tuǵyryna kóterilip júr. Árıne, biz munymen toqtap qalmaımyz. Kerisinshe, ári qaraı da parasportqa kóbirek kóńil bólýdi jalǵastyra beremiz. Ásirese, Parıjdegi Paralımpıada qarsańynda daıyndyqty kúsheıtýimiz kerek», dedi Mádenıet jáne sport vıse-mınıstri Sársen Quranbek.