Aqparat jáne qoǵamdyq damý mınıstrligi ázirlep, E-gov saıtynda jarııalanǵan «Mass-medıa týraly» zańynyń jobasymen tanysyp shyqtyq. Bastapqyda 70 baptan turatyn qujat uzaqtaý kóringen. Sóıtsek, jobada buqaralyq aqparat quraldary jáne teleradıo habarlaryn taratý baǵyttary barynsha qamtylǵan eken.
Jobanyń basty artyqshylyǵy – qujatta jýrnalıstiń quqyqtary men mindetteri barynsha naqtylanyp, jýrnalıst mártebesi tuńǵysh ret belgilengen. Jýrnalıst mártebesi – otyz jyldan beri aıtyp júrgen máselemiz. Jýrnalısterdi basqa jazǵyshtardan ajyratatyn «press-kartanyń» engizilýi de quptarlyq qadam. Baspasóz kartasy jýrnalıstik joǵary bilimi bar, BAQ-ta keminde úsh jyl, dıplomy joqtarǵa keminde bes jyl tájirıbesi bar azamattarǵa beriledi. Bul ári qaraı jýrnalıst mártebesin ıelengenderdiń áleýmettik jaǵdaılaryn sheshýge yqpal etse, nur ústine nur bolar edi.
Árıne, mundaı qaǵıdalar blogerlerge, ınternet resýrstarda jumys isteıtinderge jaqpaýy múmkin. Menińshe, olarǵa arnalǵan basqa zań jobasy ázirlengeni durys.
Jobada taǵy bir atap ótetin nárse – memlekettik tilge qatysty talaptardyń kúsheıtilýi. Eń aldymen memlekettik tildegi tele-radıo baǵdarlamalarynyń kólemi basqa tilderdegi baǵdarlamalardyń jıyntyq kóleminen kem bolmaýǵa tıis ekendigi kórsetilgen. Sýbtıtr paıdalanylatyn telebaǵdarlamalar men fılmderdiń aýdarmasy memlekettik tildegi telebaǵdarlamalardyń jalpy kólemine kirmeıtindigi de tilge qatysty talaptardy kúsheıte túsedi.
Jeke basyma zań jobasynyń 24-babyndaǵy sheteldik tele, radıoarnanyń materıaldary Qazaqstan Respýblıkasynyń konstıtýsııalyq qurylysyn kúshtep ózgertýdi, tutastyǵyn buzýdy, memleket qaýipsizdigine nuqsan keltirýdi, soǵysty, ekstremızmdi nemese terrorızmdi, qatygezdik pen zorlyq-zombylyqty nasıhattaıtyn bolsa, ondaı sheteldik buqaralyq quraldardy esepke qoıýdan bas tartylatyny unady.
Sondaı-aq dybystyq súıemeldeýdiń kóp arnaly berilýin paıdalanatyn telearnalar negizgi dybystyq súıemeldeýdi memlekettik tilde paıdalanýǵa tıis ekendigi de mindettelgen. Jalpy alǵanda, bul joba aldaǵy ýaqytta mass-medıa salasynyń jemisti jumys isteýine ábden jarap tur.
Marat TOQAShBAEV,
jazýshy-pýblısıst