Qazaqstan Premer-mınıstriniń orynbasary – Syrtqy ister mınıstri Muhtar Tileýberdi jáne Almaty qalasynyń ákimi Erbolat Dosaev BUU agenttikteriniń basshylarymen jáne ońtústik astanada akkredıttelgen dıplomatııalyq korpýspen birlesken kezdesý ótkizdi, dep habarlaıdy Egemen.kz SIM baspasóz qyzmetine silteme jasap.
Almatydaǵy halyqaralyq uıymdar keńsesiniń ǵımaratyna «UN Plaza» ataýyn berý rásimi ótti. Bul ǵımarattyń resmı ınaýgýrasııasy 2019 jyldyń mamyr aıynda Prezıdent Qasym-Jomart Toqaevtyń qatysýymen ótti. Búgingi tańda Almaty qalasyndaǵy BUU ǵımaratynda shtattyq sany 120 adamnan asatyn 18 agenttik ornalasqan.
BUU ókilderimen kezdesý barysynda M. Tileýberdi BUU-nyń Qazaqstanda bolǵanyna 30 jyl tolýymen quttyqtap, osy kezeńdegi elimiz ben jahandyq uıym arasyndaǵy ózara is-qımyldyń joǵary deńgeıin atap ótti. Qazaqstannyń Almatyda Ortalyq Azııa men Aýǵanstan úshin ornyqty damý maqsattary boıynsha BUU О́ńirlik ortalyǵyn qurý jónindegi bastamasyna erekshe nazar aýdaryldy. «Mýltılateralızmge berik senim men mindetteme, boljamdy jáne syndarly syrtqy saıasat Qazaqstan úshin basty basymdyq. О́ńirlik ortalyqtyń qyzmeti BUU óńirlik damý júıesin iske asyrý sheńberinde tıimdi qural bolady», dedi mınıstr.
Sonymen qatar ol kezdesýge qatysýshylardy Qazaqstandaǵy saıası reformalardyń iske asyrylý barysy jáne 2023 jylǵy 19 naýryzda josparlanǵan aldaǵy parlamenttik saılaýǵa daıyndyq týraly habardar etti.
О́z kezeginde Almatydaǵy BUU men dıplomatııalyq korpýs ókilderi el basshylyǵynyń «Jańa jáne Ádiletti Qazaqstandy» qurýǵa baǵyttalǵan kúsh-jigerin joǵary baǵalady. Sondaı-aq Almatyda qyzmetti júzege asyrý úshin qolaıly jaǵdaıdy qamtamasyz etýde kórsetken qoldaýy úshin Úkimet pen ákimdikke alǵys bildirdi.