О́tken senbi kúni Qazaqstanda kezekti fýtbol maýsymynyń shymyldyǵy túrildi. Jyldyń alǵashqy resmı matchynda byltyrǵy el chempıony «Astana» men Qazaqstan kýbogi básekesiniń jeńimpazy Shymkenttiń «Ordabasy» klýbtary Qazaqstan sýperkýbogin sarapqa saldy.
«Astana Arena» stadıonynda ótken elimizdegi eń myqty eki ujym arasyndaǵy kezdesýdiń sózsiz favorıti «Astana» klýby edi. О́ıtkeni olar birinshiden óz alańynda, ekinshiden jergilikti jankúıerlerdiń qyzý qoldaýy astynda oınady. Dese de, kópshilik jurt maýsymaralyq úziliste quramyn túgeldeı jańartyp, qataryn ulttyq qurama sapynda óner kórsetetin myqty fýtbolshylarmen tolyqtyrǵan «Ordabasy» klýbynan da erekshe oıyn kútti. Shymkenttik ujymda bıyldan bastap Qazaqstan ulttyq quramasy men burynǵy «Tobyldyń» jartylaı qorǵaýshysy Ashat Taǵybergen, sondaı-aq elimizdiń bas quramasynda oınaıtyn qorǵaýshylar Temirlan Erlanov pen Sergeı Malyı, qaqpashy Muhamedjan Seısen, shabýylshy Aıbar Jaqsylyqov jáne taǵy basqa fýtbolshylar dop tebedi.
Grıgorıı Babaıan jattyqtyratyn «Astana» klýby da transfer kezeńinde qarap qalǵan joq. Máselen, elimizdiń jeti dúrkin chempıondary óz qataryna serbııalyq jartylaı qorǵaýshy Dýshan Iovanchıchti, chernogorııalyq qorǵaýshy Jarko Tomashevıchti, gambııalyq shabýylshy Dembo Darboeni, horvatııalyq qaqpashy Iosıp Chondrıchti jáne fransııalyq jartylaı qorǵaýshy Faben Ýregandy qosyp aldy.
Sóıtip, Qazaqstan sýperkýbogi aıasynda toqsan mınýtqa jalǵasqan tartysty matchta «Astana» klýbynyń mereıi ústem bolyp, altynshy márte altyn kýbogti jeńip aldy. Elordalyq ujym buǵan deıin 10 márte fınalda oınap, sonyń tek beseýinde ǵana jeńis toıyn toılaǵan bolatyn. Mine, bıyl altynshy márte jańa maýsymdy jeńispen bastap otyr. «Ordabasy» klýbyna keler bolsaq, ońtústikten kelgen komanda bıyl óz tarıhynda ekinshi ret sýperkýboktiń fınalyna shyqty. Alǵash ret olar 2012 jylǵy fınalda oınap, sol jyly-aq kýbokty basynan asyra kótergen edi.
Jeti myńnan asa jankúıer tamashalaǵan bıylǵy «Astana» men «Ordabasy» arasyndaǵy matchta alań ıeleri aıqyn basymdyqpen jeńiske jetti dep aıta almaımyz. Teń dárejede ótken oıyn taǵdyryn 11 metrlik aıyp doby sheship ketti. Kezdesýdiń esebin 8-mınýtta «Astananyń» jańa oıynshysy Aleksa Amanovıch ashty. Qorǵaýshynyń alystan baǵyttaǵan joıqyn soqqysymen salǵan ádemi golyna jergilikti jankúıerler qýanyp bolamyn degenshe «Ordabasyǵa» qaıta oralǵan Erkebulan Tuńǵyshbaev komandalasy Ashat Taǵybergenniń pasynan keıin baspen gol soǵyp, bir mınýttyń ishinde tarazy basyn teńestirip ketti – 1:1. Keıinnen match biraz saıabyrsyp qalǵandaı boldy. Birinshi taım aıaqtalar tusta qonaqtardyń oıynshysy Shohboz Ýmarov elordalyq shabýylshy Dembo Darboǵa qarsy oıyn erejesin buzyp, tóreshi «Ordabasy» qaqpasyna penaltı belgiledi. 11 metrlik núktede múlt ketpegen Darbo óziniń debıýttik kezdesýinde gol soǵyp, komandasyn jeńiske jeteledi. Oıynnyń ekinshi kezeńinde qos komanda esepti ózgertýge tyrysqanymen, gol soǵa almady. Qorytyndy esep – 2:1. Osylaısha, «Astana» óz tarıhynda altynshy ret Qazaqstan sýperkýboginiń jeńimpazy atandy.
Endi komandalar kelesi aptada bastalatyn fýtboldan Qazaqstan chempıonatynyń matchtaryna daıyndalady. 4-5 naýryz kúnderine josparlanǵan el birinshiliginiń 1-týr oıyndarynda «Astana» óz alańynda Qaraǵandynyń «Shahterin» qabyldasa, «Ordabasy» Shymkentte Aqtaýdyń «Kaspııimen» kezdesedi. Sondaı-aq bul týrda «Jetisý» – «Aqtóbe», «Tobyl» – «Aqsý», «Qaısar» – «Qyzyljar», «Oqjetpes» – «Maqtaaral» jáne «Qaırat» – «Atyraý» komandalary oınaıdy.