21 aqpanda Kýveıtte eki iri stendtik atý jarysy – Azııa Kýbogy jáne «Kýveıt Gran-prıi» bastalǵan edi, oǵan álemniń túkpir-túkpirinen kelgen 350-den astam sportshy qatysý nıetin bildirgen. Qazaqstan atynan 28 mergen baq synap jatyr, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
Otandastarymyz eki týrnırde de erekshelenip, barlyǵy 13 medal jeńip aldy: 6 altyn, 4 kúmis jáne 3 qola. Olardyń barlyǵy da dóńgelek stendten atý jarysynan berildi.
Azııa Kýbogynyń altyn medalin Olga Panarına men Zoıa Kravchenko, Ásem Orynbaı jáne Olga Panarına bastaǵan áıelder quramasy, Danıl Strelsov pen Adel Sadaqbaeva bastaǵan jasóspirimder quramasy, sondaı-aq mıks-komanda – Ásem Orynbaı jáne Edýard Eshenko ıelendi. Kúmis medaldi Edýard Eshenko, Iýnýs Machjon jáne Artem Sedelnıkov bastaǵan erler quramasy, jasóspirimder quramasynan Ilıa Penkov pen Amalııa Kýdrıavseva, sondaı-aq Zoıa Kravchenko men Iýnýs Machjon bastaǵan aralas komanda aldy. Qola júldegerlerdiń úshtiginde Ásem Orynbaı, Edýard Eshenko jáne jasóspirimder tobynan Evelına Shek bar.
Al Zoıa Kravchenko Qazaqstan qorjynyna eń bedeldi «Kýveıt Gran-prıi» altyn júldesin saldy. Aıtýly jarysta oǵan teń keler sportshy bolmady.
«Stendtik jáne oq atý Qazaqstanda qarqyndy damyp keledi, buǵan bizdiń quramanyń iri halyqaralyq týrnırlerdegi sońǵy nátıjeleri dálel bola alady. Medaldardy tek bizdiń eresekter komandasy ǵana emes, jasóspirimder de jeńip alǵany erekshe qýantady. Bul taǵy da otandyq mergender mektebiniń kúshi men qazaqstandyq jattyqtyrýshylardyń joǵary biliktiligin kórsetedi», dedi Mádenıet jáne sport vıse-mınıstri Sársen Quranbek.
Aıta keteıik, Azııa Kýbogy men «Kýveıt Gran-prıi» 2 naýryzda aıaqtalady.