Búgin ortalyq jáne aımaqtyq memlekettik organdardyń baspasóz hatshylaryna arnalǵan semınarda Aqparat jáne qoǵamdyq damý mınıstri Darhan Qydyráli memlekettik qyzmetshilerdiń jýrnalısterge jaýap berý merzimi qysqaratynyn habarlady, dep jazady Egemen.kz.
«Aqparatqa qol jetkizý máseleleri jónindegi zańǵa da túzetýler ázirlendi. Usynylǵan ózgerister, azamattardyń aqparatqa qol jetkizý quqyǵyn zańsyz shektegen memlekettik organdardyń jaýapkershiligin kúsheıtedi. Endi jýrnalıstiń saýalyna jaýap berý merzimi qysqarady. Qazir 7 kún bolsa, endi ol 3-5 kún bolyp qysqarady», dedi mınıstr.
Mınıstrdiń aıtýynsha, bul aqparattyq ashyqtyqty arttyrýmen qatar, jaýapkershilikti de kúsheıte túspek.
«Sondaı-aq aqparattyq qaýipsizdik doktrınasy iske asyrylady. Doktrınanyń negizgi mindeti – otandyq medıa keńistiktiń básekege qabilettiligin arttyrý jáne eldiń aqparattyq derbestigin qamtamasyz etý», dedi D.Qydyráli.
Sonymen birge mınıstr qazir talqylanyp jatqan «Mass-medıa» týraly zań jobasynyń negizgi maqsaty da jýrnalıster mártebesin kóterý, otandyq kontentti qoldaý jáne ulttyq aqparatty qorǵaý ekenin atap ótti.
Aıta keteıik, Astana qalasynda memlekettik organdar baspasóz hatshylaryna arnalǵan semınar ótip jatyr.