Álemdegi saıası jaǵdaıǵa baılanysty týyndaǵan áýesqoı boks tóńiregindegi daý qaıta órshı tústi. О́tken aıda birqatar memlekettiń boks federasııalary qyzdar (Úndistan) men erler (О́zbekstan) arasyndaǵy bokstan álem chempıonatyna qatysýdan bas tartqany belgili. Sonyń qarymtasy retinde birer kún buryn Halyqaralyq boks assosıasııasy (IBA) Reseı men Belarýs bylǵary qolǵap sheberleriniń dúnıejúzilik dodada óner kórsetýine qarsy bolǵan federasııa basshylaryna qatysty tártiptik is qozǵady.
«IBA táýelsiz etıka komıteti AQSh, Kanada, Chehııa, Shvesııa jáne Jańa Zelandııa boks federasııalarynyń ókilderine IBA Konstıtýsııasyn jáne onyń tártip pen etıka kodeksin buzǵany úshin shaǵym túsirdi», delingen IBA-nyń resmı saıtyndaǵy habarlamada.
Atap aıtqanda, IBA AQSh boks federasııasynyń bas dırektory Maık Maket, Kanada boks federasııasynyń prezıdenti Raıan O’Shı, Chehııa boks assosıasııasynyń prezıdenti Marek Shıma, Shvesııa boks assosıasııasynyń tóraǵasy Per-Aksel Sheholm jáne Jańa Zelandııa boks federasııasynyń prezıdenti Stıv Hartlıge qatysty tártiptik is qozǵady. Sonymen qatar táýelsiz etıka komıteti ózge de ulttyq federasııa basshylarynyń boıkotqa qatysy bar-joǵyn tekseretinin de málimdedi. Osylaısha, IBA jasyryn túrde ózderine qarsy shyqqan ulttyq federasııalarmen ashyq aıqasqa kiriskenin baıqatty.
«Boksta kemsitýshiliktiń qandaı da bir túrine oryn joq jáne IBA mundaı jaǵdaıdy boldyrmaýdy óziniń mıssııasy dep sanaıdy. Sonymen qatar Halyqaralyq boks assosıasııasy halyqaralyq arenadaǵy óziniń adaldyǵy men bedeline nuqsan keltiretin belgili bir top ókilderiniń qaralaýyna jol bermeıdi», delingen habarlamada.
Esterińizde bolsa, 2022 jyldyń qazanynda IBA prezıdenti Ýmar Kremlev Reseı men Belarýs sportshylary 2023 jyly ótetin bokstan qyzdar men erler arasyndaǵy álem chempıonattarynda óz týlary astynda óner kórsetetinin málimdegen bolatyn. Halyqaralyq Olımpıada komıteti (HOK) tarapynan salynǵan sanksııalarǵa (óz týy astynda jarystarǵa qatystyrmaý) qaramastan, IBA-nyń qabyldaǵan osyndaı daýly sheshimine joǵaryda attary atalǵan memlekettiń boks federasııalary óz narazylyqtaryn bildirip, birinen soń biri álem chempıonattaryna boıkot jarııalaı bastady. Sondaı-aq AQSh boks federasııasy halyqaralyq boks uıymynyń qarjylyq basqarýy ashyq túrde jarııalanbaıtynyn jáne sanksııa salynǵan kompanııalarmen tyǵyz jumys isteýi boıkot jarııalaýǵa sebep bolǵanyn málimdegen edi.
Álemniń onnan asa memleketi boks básekelerine qatysýdan bas tartatyndaryn aıtsa da, IBA prezıdenti Ýmar Kremlev halyqaralyq federasııalar men HOK talabyn oryndaýǵa báribir nıetti emes ekenin jetkizdi. Atap aıtqanda, ol ár sportshyǵa óz eliniń týy astynda rıngte óner kórsetýine jáne memleketiniń ánuranyn shyrqatýǵa múmkindik beretinine ýáde berdi. Sonymen qatar Kremlev sportshylardy mundaı múmkindikten aıyryp otyrǵan sheneýnikter men saıasatkerlerge sportta orny joq ekenin de jetkizdi.
...Birinshi raýnd barysynda eki «boksshy» da rıng ortasynda bir qarys artqa sheginbeı, óz múddesi úshin ashyq aıqastan aıanyp qalǵan joq. Qazirshe úzilis. Eki tarap rıngtiń eki buryshynda «bapkerleriniń» aqyl-keńesin tyńdap, ekinshi raýndta ustazdarynyń bergen tapsyrmalaryn buljytpaı oryndaý úshin daıyndalyp jatyr... Bul tartysta kimniń jeńetini ázirge belgisiz. Birinshi raýndtan keıin tarazy basy teń túsip tur.
Aıta keteıik, Úndistan astanasy – Nıý-Delıde jalaýy jelbireıtin áıelder arasyndaǵy álem chempıonaty 15-31 naýryz, О́zbekstannyń Tashkent qalasyndaǵy erler básekesi 1-14 mamyr aralyǵynda ótedi dep josparlanǵan.